Ҳукумати Тоҷикистон боло бурдани ҳаҷми нафақа, кумакпулӣ, стипендия ва музди меҳнати кормандони буҷетро тобистони соли равон дар нақша дорад.

Зимни нишасти хабари рӯзи 11 январ раиси Маркази тадқиқоти стратегии назди президенти ҶТ Худойбердӣ Холиқназар дар ин робита изҳор намуд, ки болоравии музди меҳнат ва дигар пардохтҳои иҷтимоии моҳи сентябри соли гузашта ваъдашуда моҳи июн-июли соли ҷорӣ амалӣ мешавад.

Ӯ қайд кард, ки соли гузашта бинобар сабаби мушкилоти молиявӣ, ҳукумат натавонист, ки уҳдадориҳои назди кормандони буҷет гирифтаашро ба иҷро расонад.

Ёдрас мекунем, ки ар  паёми худ ба парлумон  аз 23 январи соли 2015 президенти мамлакат  изҳор дошта буд , ки бо дарназардошти рушди иқтисодиёти мамлакат ва имкониятҳои имрӯзаи молиявӣ аз 1-уми сентябри соли равон марҳалаи навбатии зиёдшавии музди меҳнати кормандони соҳаҳои буҷетӣ амалӣ карда мешавад.

Аз ҷумла музди меҳнати кормандони мақомоти ҳокимият ва идоракунии давлатӣ, кормандони мақомоти ҳифзи ҳуқуқ ва хизматчиёни ҳарбӣ 15 фоиз, кормандони муассисаҳои маориф, аз ҷумла муассисаҳои таҳсилоти томактабӣ, миёнаи умумӣ ва олӣ, дигар муассисаҳои соҳаи маориф, илм, фарҳанг, варзиш ва тандурустӣ 20 фоиз, муассисаҳои соҳаи ҳифзи иҷтимоӣ, аз ҷумла хона – интернатҳо барои пиронсолону маъюбон, шуъбаҳои кумаки иҷтимоӣ дар хона ва истироҳатгоҳу осоишгоҳҳо барои собиқадорони Ҷанги Бузурги Ватанӣ, меҳнат ва шахсони ба онҳо баробаркардашуда 25 фоиз зиёд карда мешавад.

Ҳадди ақал ва ҳадди ниҳоии нафақа аз рӯи синну сол ва нафақаи заминавӣ, инчунин нафақаҳои меҳнатии шаҳрвандон ба ҳисоби миёна то 20 фоиз зиёд карда мешаванд.

Дар баробари ин, стипендияи донишҷуён ва дигар намудҳои стипендия 30 фоиз, инчунин музди меҳнати ҳадди ақал 60 фоиз зиёд гардида, андозаи он аз 250 сомонӣ то ба 400 сомонӣ баробар мегардад.

Барои иҷрои ин супориш аз буҷети давлатӣ ва буҷетҳои маҳаллии шаҳру ноҳияҳо ҷудо гардидани 329 млн. сомонӣ маблағ пешбинӣ шуда буд.