Ҷумҳурии Туркия ба осебдидагон аз офатҳои табиӣ дар Тоҷикистон кумаки башардӯстона фиристод.

Тавре ба «Азия-Плюс» аз сафорати Туркия дар Душанбе иттилоъ доданд, кумак дар посух ба дархости Тоҷикистон ҷиҳати ёрӣ ба осебдидагон аз заминларзаи моҳи декабр дар ВМКБ ирсол мегардад.

Ба иттилои манбаъ, беш аз 80 тонна кумаки башардӯстонаи иборат аз маҳсулоти ғизойӣ, маводи санитарӣ ва кӯрпаву кампалҳо барои 500 оилаи муқими минтақаи офат аз ҷониби намояндагони сафорати Туркия дар Душанбе ва Агентии ҳамкории байнулмилалӣ ва рушди Туркия (ТИКА) ба ихтиёри кормандони Агентии давлатии захираҳои моддии назди ҳукумати Тоҷикистон супурда шудааст.

«Дар чунин вазъҳои душвор Туркия ҳамроҳи мардуми Тоҷикистон хоҳад буд», - таъкид мешавад дар маълумоти сафорати Туркия.