Раиси Кумитаи андози назди ҳукумати ҶТ Нусратулло Давлатзода изҳор намуд, ки тақрибан 90%-и сарояндагон дар Тоҷикистон уҳдадориҳои худ оид ба пардохти андозро иҷро намекунанд.

«Чанде қабл рӯйхате ба дастам расид, ки дар он сарояндагони андозро пардохткарда номбар шудаанд. Дар ин рӯйхат аксари сарояндагоне, ки мо ҳамарӯза дар оинаи нилгун мебинем, зикр нашудаанд», - гуфт Давлатзода зимни нишасти хабарии рӯзи 25 январ дар Душанбе.

Тибқи ҳисобу китоби ӯ, дар рӯйхат тақрибан 90%-и овозхононе, ки мунтазам ҳунарнамоии онҳоро метавон дар телевизион тамаошо кард, зикр нашудаанд.

Роҳбари Кумитаи андоз қайд кард, ки чунин шахсонеро, ки даромадҳои калон дошта, аз пардохти 200-300 сомонӣ барои патент саркашӣ мекунанд, дарк карда наметавонад.

Давлатзода аз ифшои ному насаби чунин сарояндагон худдорӣ варзида, зикр кард, ки «ба эҳсосоти касон дахолат карданӣ нест».

Ӯ таъкид дошт, ки ба мақомоти андози шаҳри Душанбе ва дигар сохторҳои дахлдор дастур дода шудааст, ки масъалаи шахсони саркаш аз пардохти андозро ҳаллу фасл намоянд.

Давлатзода изҳор дошт, ки мақомоти андоз дар ин масъала ба мушкилиҳои зиёд дучор мешаванд. «Ҳамаи ин мушкилот ба менталитет ва фарҳангу маданияти чунин сарояндагон вобаста аст. Мо бояд дар доираи қонунгузорӣ зиндагӣ ва кор карданро омӯзем», - афзуд раиси Кумитаи андоз.