Раиси шаҳри Душанбе Маҳмадсаид Убайдуллоев ҷаласаи васеи мақомоти шаҳрдории пойтахтро баргузор намуда, дар он масоили марбут ба ҳалли мушкилоти кори нақлиёти ҷамъиятӣ, таъмини сокинони шаҳр бо оби ошомиданӣ, таъмиру таҷдид ва чароғонсозии роҳҳо, таъмини бозорҳои пойтахт бо маҳсулоти ниёзи аввалия, таъсиси ҷойҳои нави корӣ, пешгирии ҷиноятҳои коррупсионӣ ва саривақт аз қаламрави шаҳр берун баровардани партовҳои маишӣ баррасӣ шуданд.

Тавре як манбаъ аз мақомоти шаҳрдории Душанбе ба «Азия-Плюс» дар ин робита иттилоъ дод, барои роҳ додан ба камбудиҳо директори муассисаи давлатии Боғи фарҳангу фароғати «Дӯстии халқҳо» Шералӣ Раҳмонов аз вазифааш озод карда шудааст.

Дар машварат ҳамчунин масъалаи омодагии пойтахт ба ҷашни Наврӯз баррасӣ шуда, қарор шудааст, ки чорабиниҳои идона ба муносибати ҷашни Наврӯз рӯзи 21 март дар маҷмааи Наврӯзгоҳ доир гардида, дар он устодони санъати тоҷик, намояндагони ҳамаи маҳаллаҳои пойтахт иштирок мекунанд.

Тибқи қарори қабулшуда, рӯзи 22 март дар тамоми боғҳои фарҳангу фароғати Душанбе сайругаштҳои оммавии сокинон ва меҳмонони пойтахт ва консертҳо баргузор мешаванд. Дар ин рӯз дар маҷмааи Наврӯзгоҳ мусобиқаҳо оид ба гуштии миллӣ доир гардида, ҷоизаи асосӣ автомашинаи сабукрав хоҳад буд.

Санаи 23 март иди Наврӯз ддар сатҳи ноҳияҳои шаҳр ҷашн гирифта шуда, дар маҷмааи Наврӯзгоҳ пойгаҳои аспдавонӣ баргузор мешаванд ва ҷоизаи асосии ин мусобиқот аспи зотии даванди тоҷикӣ аст. Рӯзи 24 март дар тамоми шаҳр чорабиниҳои оммавии кабудизоркунӣ гузаронида мешаванд.