Аспи мутааллиқ ба Беҳзод Файзуллоев, роҳбари ширкати мобилии «Вавилон» бо лақаби «Варс» дар пойгаи аспдавонӣ, ки ба муносибати ҷашни Наврӯз дар маҷмааи «Наврӯзгоҳи пойтахт» баргузор шуд, ғолибият ба даст овард.

Бино ба маълумоти дафтари матбуоти Кумитаи миллии олимпии Тоҷикистон, масофаи пойгаи аспдавонӣ 2 ҳазору 200 метрро ташкил дода, дар он 80 асп аз шаҳри Душанбе ва ноҳияҳои Рӯдакӣ, Файзобод, Нуробод, Ховалинг, Балҷувон ва ғайра рақобат кардаанд.

Ғолиби пойга, соҳиби аспи «Варс» - Беҳзод Файзуллоев ба сифати шоҳҷоиза бо аспи сафеди зоти тоҷикӣ сарфароз гардонида шудааст.

Қобили зикр аст, ки аспи «Варс» 9-сола буда, дар чунин мусобиқаҳо бори дуюм иштирок мекунад. Қаблан ин асп дар пойгаи аспдавонии соли 2013 низ ғолиб омада буд.