Раиси шаҳри Душанбе Маҳмадсаид Убайдуллоев рӯзи 28 март машварати кории мақомоти шаҳрдории пойтахтро баргузор намуд, ки дар он мушкилоти марбут ба ҳаракати нақлиёти автомобилӣ дар шаҳр баррасӣ шуд.

Бино ба иттилои дафтари матбуоти мақомоти шаҳрдории пойтахт, М.Убайдуллоев ба сохторҳои дахлдор дастур дод, ки дар муҳлати як моҳ оид ба ҳаллу фасли мушкилоти марбут ба фаъолияти хатсайрҳои ғайриқонунии нақлиёти ҷамъиятӣ ва таваққуфи стихиявии воситаҳои нақлиёти ҷамъиятӣ дар назди истгоҳҳо ва гузаргоҳҳои зеризаминии серанбӯҳи аҳолӣ тадбирҳои муассир андешанд.

Ҳамчунин дастур дода шуд, ки ҳар моҳ доир ба масоили ҳимояи ҳуқуқи мусофирон, риояи меъёрҳои санитарӣ ва реҷаи кор дар нақлиёти ҷамъиятӣ ба раиси шаҳр маълуомт пешниҳод карда шавад.

Бо мақсади таъмини амнияти ҷамъиятӣ ва ҳимояи амнияти шаҳрвандон, раиси пойтахт дастур дод, ки дар ҳамаи масҷидҳои расман амалкунандаи шаҳр аз ҳисоби худи масҷидҳо камераҳои мушоҳидавӣ ва дастгоҳҳои муосири кашфи ҷисмҳои металлӣ насб карда шавад.

Ҳамзамон супориш дода шуд, ки чунин муқаррарот дар муассисаҳои тиббӣ ва маориф, тарабхонаҳо, марказҳои савдою маишии шаҳр ҷорӣ ва назорати фаъолияти доимии онҳо аз ҷониби сохторҳои зидахл комилан таъмин шавад.