Ахири ҳафтаи сипаришуда дар Искандарияи Миср дуюмин Конфронси байналмилалӣ таҳти унвони “Саҳми сарзамини Варорӯд дар ғанисозии тамаддуни исломӣ” баргузор шуд.

Тавре аз сафорати Тоҷикистон дар Миср иттилоъ доданд, созмондиҳандагони конфронси мазкур Донишкадаи одоби Водии Ҷадид, Донишгоҳи Асют ва Китобхонаи Искандария буда, дар он донишмандону пажӯҳишгарони мисриву хориҷӣ ва дипломатҳои кишварҳои Осиёи Марказӣ иштирок карданд.

Дар суханронии сафири Тоҷикистон дар Қоҳира Хусрав Нозирӣ, ки аз шодбоши наврӯзӣ оғоз ёфт, таъкид шуд, ки тоҷикон ворисони аслии мероси фарҳангии Мовароуннаҳр буда, саҳми ниёкони мо дар ғанисозии он тамаддун беназир аст.

Бо ишора ба ҷойгоҳи муҳимми фарҳангӣ ва илмии Миср дар ҷаҳони араб ва минтақа, сафири Тоҷикистон изҳори умедворӣ намуд, ки конфронс ба барқарорсозӣ ва густариши ҳамкории самарбахш байни конунҳои илмии ду кишвар ҷиҳати пажӯҳиши якҷояи осори муштараки фарҳангӣ мусоидат хоҳад кард.