Бо қарори раиси шаҳри Душанбе Маҳмадсаид Убайдуллоев, дар робита ба таҷлили ҷашни 25-умин солгарди Истиқлолияти давлатии Тоҷикистон дар мақомоти шаҳрдории пойтахт Дирексия оид ба ташкил ва баргузории Намоиши театришуда бахшида ба ин ҷашн таъсис дода мешавад.

Бино ба иттилои сомонаи расмии мақомоти шаҳрдории Душанбе, ҳайати дирексияи мазкур аз директори генералӣ, муовинони директори генералӣ оид ба корҳои эҷодӣ ва корҳои молиявӣ, директори техникӣ, роҳбари бадеӣ, роҳбари мусиқӣ, сарбалетмейстер ва  саррассом иборат хоҳад буд.

Бо мақсади таъмини шаффофият ва интихоби мутахассисони беҳтарини дорои таҷрибаи роҳбарию тахассусии сатҳи муосирдошта барои ишғоли ин вазифаҳо комиссияи озмунӣ таъсис дода мешавад, ки ба ҳайати он адибони шинохта, рассомон, олимон ва ходимони маъруфи фарҳанги ҷумҳурӣ шомил мешаванд.

Дар озмун барои ишғоли вазифаҳо дар ин дирексия шаҳрвандони бо масоили эҷодӣ сарукордоштаи Тоҷикистон ва ҳамчунин намояндагони кишварҳои хориҷӣ иштирок карда метавонанд.