Маҷлиси вакилони халқи шаҳри Душанбе имрӯз дар бораи табдили номи як қатор кӯчаву хиёбонҳои шахри Душанбе қарор қабул карда, яке аз кӯчаҳои пойтахт номи сиёсатмадори варзидаи тоҷик Сӯҳроб Шариповро гирифт.

Бино ба иттилои хадамоти матбуоти шаҳрдории Душанбе, тибқи ин қарор кӯчаи Шаумян дар ноҳияи Шоҳмансур, каме дуртар аз фурудгоҳ - ба кӯчаи Сӯҳроб Шарипов, собиқ роҳбари Маркази тадқиқоти стратегии назди президенти ҶТ, кӯчаи ба номи Олег Кошевой - ба кӯчаи ба номи Ваҳҳобҷон Иномов, Қаҳрамони меҳнати сотсиалистӣ, кӯчаи Таманно - ба кӯчаи Само, кӯчаи Добролюбов - ба кӯчаи Садоқат ва кӯчаи ба номи Глинка - ба кӯчаи Нурафзо табдили ном карданд.

Ёдрас мекунем, ки Сӯҳроб Шарипов рӯзи 19 январи соли 2015 пас аз бемории начандон тӯлонӣ дар синни 52-солагӣ дар Душанбе аз олам даргузашт. Тайи се соли ахири ҳаёташ ӯ ба ҳайси вакили Маҷлиси намояндагони Маҷлиси Олии Тоҷикистон фаъолият дошт.