Палатаи поёнии парлумони Тоҷикистон имрӯз, 13 май Созишномаи кафолатноки соли гузашта баимзорасида миёни ҳукумати ҷумҳурӣ ва Бонки аврупоии таҷдиду рушд (БАТР) аз рӯи лоиҳаи «Рушди нақлиёти ҷамъиятии шаҳри Хуҷанд»-ро якдилона тасдиқ кард.

Зимни суханронӣ доир ба ин масъала муовини вазири молияи Тоҷикистон Ҷамшед Нурмуҳаммадиён қайд кард, ки баҳри амалисозии лоиҳа БАТР 26 млн. доллари ИМА маблағ ҷудо мекунад, ки 8,6 млн. доллари он ба сифати грант аст.

Ғайр аз ин, дар доираи амалисозии лоиҳа БАТР ба сифати кумаки техникӣ боз 840 ҳазор доллари ИМА низ ихтисос медиҳад.

Анҷоми лоиҳа ахири соли 2017 дар назар буда, дар доираи он харидории 100 адад автобусҳои муосир, азнавсозии ҳамаи истгоҳҳои нақлиёти ҷамъиятӣ дар шаҳри Хуҷанд ва роҳандозии низоми фурӯши билетҳо ба мусофирон пешбинӣ шудааст.

Қаблан зикр гардида буд, ки ин қарз бо ду қисмат ба Корхонаи давлатии коммуналии «Нақлиёти ҷамъиятии Хуҷанд» дода мешавад, ки ин корхона ба танзими  кори ҳамаи нақлиёти ҷамъиятии шаҳр масъул аст.

Қайд шуда буд, ки қарз ба шаҳр имкон медиҳад, ки то 100 адад автобуси фаршашон паст харида, депои автобусҳоро таъмиру таҷдид намояд ва ҳамчунин таҷҳизоти нави таъмир насб намуда, низоми нави пардохти раҳкироро ҷорӣ созад.