Бонки давлатии амонатгузории Тоҷикистон «Амонатбонк» дар бораи ивази кортҳои бонкии нафақахӯрон дар шаҳри Душанбе эълон интишор намуд.

Бино ба иттилои БДА «Амонатбонк», кортҳои бонкии нафақагирон бо сабаби ба итмом расидани муҳлати истифодабариашон то санаи 15 июли соли ҷорӣ иваз карда мешаванд.

Гуфта мешавад, барои иваз кардани кортҳои бонкӣ ба марказҳои хизматрасонии бонкии Амонатбонк, ки дар макони зист амал мекунанд, муроҷиат кардан зарур аст.

Ҳамчунин қайд мешавад, ки дастрас кардани корти нав бо пешниҳоди хуҷҷати тасдиккунандаи шахс супорида  мешавад.

Тибқи маълумоти БДА «Амонатбонк», айни замон шумори нафақахӯрон дар шаҳри Душанбе беш аз 51,1 ҳазор нафарро ташкил медиҳад.

Дар маҷмӯъ тибқи маълумоти Агентии давлатии суғуртаи иҷтимоӣ ва нафақаи назди ҳукумати ҶТ, шумори нафақахӯрон дар кишвар дар семоҳаи аввали соли равон зиёда аз 626 ҳазор нафарро ташкил додааст, ки дар муқоиса бо ҳамин давраи соли гузашта қариб 13 ҳазор нафар ё худ 2,6% зиёдтар аст. Афзоиши бештар шумори нафақахӯрон дар ВМКБ - 3,6%, шаҳри Душанбе - 2,6% ва ноҳияҳои тобеи марказ - 3,1% ба қайд гирифта шудааст.