Дар зарфи 7 моҳи соли равон ба Тоҷикистон ба маблағи умумии ҳудуди 26,2 млн. доллари ИМА (моҳи гузашта - наздики 2,7 млн. $) кумаки башардӯстона ворид гардид.

Бино ба маълумоти Агентии омори назди президенти Тоҷикистон, ин кумак бо вазни умумии зиёда аз 12,7 ҳазор тонна аз 48 кишвари дунё ба Тоҷикистон оварда шудааст.

Гуфта мешавад, дар байни кишварҳои мададрасон вазни нисбатан хос аз рӯи арзиш ба Чин (26,4%), Русия (19,8%), Ҳиндустон (9,5%), Покистон (5,2%), Сербия (5,1%), Беларус (4%), Қазоқистон (3,6%), Дания (3,4%), Туркия (3,2%), Олмон (3%), Ҷумҳурии Корея (2,6%), Швейтсария (2,3%), Озарбойҷон, Нидерланд ва ИМА (1,5%-ӣ), Франсия ва Таиланд (1,3%-ӣ), Эрон (1,1%) рост меояд.

Қобили зикр аст, ки ҳаҷми кумаки башардӯстонаи тӯли 7 моҳи соли равон ба Тоҷикистон воридшуда нисбат ба ҳамин давраи соли гузашта тақрибан 3,5 млн. доллари ИМА зиёд шуда, шумори кишварҳои мададрасон 14 адад афзуд.

Аз рӯи натиҷаҳои соли 2015 ба Тоҷикистон аз ҷониби 42 кишвар дар маҷмӯъ ба маблағи ҳудуди 45 млн. доллари ИМА кумаки башардӯстона фиристода шуда буд.