Дар ҷаласаи васеи мақомоти шаҳрдории Душанбе, ки рӯзи 15 август доир гардид, раиси пойтахт Маҳмадсаид Убайдуллоев ба раисони ноҳияҳои шаҳр дастур додааст, ки тариқи мақомоти судӣ аз шахсони ҳуқуқӣ ва воқеъӣ маблағи хароҷотеро, ки аз буҷети шаҳр барои кӯчонидани иншоот ва биноҳои ғайриқонунӣ сохташуда ҷудо шуда буд, ҷуброн намоянд.

Тавре ба «Азия-Плюс» як манбаъ аз мақомоти шаҳрдории пойтахт дар ин робита иттилоъ дод, М.Убайдуллоев ҳамчунин ба мақомоти дахлдори шаҳр супориш додааст, ки масъалаи ҷорӣ кардани пардохти муайян барои истифодаи иншооти варзишӣ дар маҳаллаҳои шаҳрро, ки аз ҳисоби буҷети пойтахт сохта шудаанд, низ баррасӣ ва ҳаллу фасл созанд.

Ба иттилои манбаъ, раиси пойтахт ҳамчунин таваҷҷуҳи раисони ноҳияҳои шаҳрро ба масъалаҳои сазовор ҷашн гирифтани Рӯзи истиқлолияти давлатии кишвар, омодагӣ ба мавсими тирамоҳу зимистон, таъсиси ҷойҳои нави корӣ дар шаҳр, пешгирии ҷиноятҳои коррупсионӣ ва роҳ надодан ба изофанависӣ зимни таҳияи ҳуҷҷатҳои лоиҳавӣ ҷалб намудааст.