Барномаи USAID оид ба мубориза бар зидди бемории сил ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон имрӯз ҷаласаи навбатии Шӯрои ҳамоҳангсозӣ оид ба бемории силро, баргузор менамоянд.

Шӯрои мазкур натиҷаи ташрифи мониторинг ва баҳодиҳӣ оид ба бемории сил дар шаҳру ноҳияҳои ҷумҳурӣ дар доираи амалинамоии нақшаи миллии стратегӣ оид ба ҳимояи аҳолӣ аз бемории сил, давоми соли 2016 - ро мавриди баррасӣ қарор медиҳад. Намояндагони вазорату идораҳои дахлдор ва мутахассисони силшинос аз шаҳру ноҳияҳои ҷумҳурӣ дар ин ҷаласа ширкат меварзанд.

Бояд қайд намуд, ки ин ҷаласа бо дастгирии Барномаи USAID оид ба мубориза бар зидди бемории сил баргузор мегардад. Мақсади Барномаи USAID оид ба мубориза бар зидди бемории сил бо буҷаи 13,2 миллион доллари амрикоӣ, ки барои панҷ сол ба нақша гирифта шудааст, ин коҳиши сатҳи паҳншавии бемории сил дар Тоҷикистон мебошад.

Барнома ба тақвияти коркарди сиёсати миллӣ, беҳтар кардани дастрасии гурӯҳҳои осебпазири аҳолӣ ба ташхис ва табобат, дастгирии низоми кӯмаки тиббии ба бемор равонашуда, ҳамчунин тақвияти таҳлилгоҳу дигар бахшҳои соҳаи тандурустӣ дар вилоятҳои Суғду Хатлон ва водии Рашт таваҷҷӯҳи хос зоҳир менамояд.