Нимсолаи аввали соли равон беш аз 36, 2 ҳазор ҷойҳои корӣ дар Тоҷикистон барҳам ё ихтисор карда шуданд.

Тавре аз Агентии омори назди президенти ҶТ иттилоъ доданд, дар ин давра зиёда аз 12,4 ҳазор ҷойҳои кории доимӣ, беш аз 10,4 ҳазор - ҷойҳои кории муваққатӣ ва ҳудуди 8 ҳазор - ҷойҳои кори мавсимӣ ихтисор карда шудаанд.

Дар бахши кишоварзӣ - беш аз 12,8 ҳазор ва дар саноати коркард, сохтмон, миёнаравии молиявӣ ва дигар навъҳои фаъолияти иқтисодӣ низ ҷойҳои корӣ барҳам ё ихтисор карда шудаанд.

Нимсолаи аввали соли ҷорӣ барҳам дода шудани зиёда аз 5,3 ҳазор ҷойҳои кории аз ҷониби шахсони хусусӣ таъсисдодашуда ба қайд гирифта шудааст.

Қобили зикр аст, ки тӯли солҳои истиқлолият бинобар сабаби бекорӣ ё музди меҳнати паст, шаҳрвандони кишвар ба муҳоҷирати корӣ ба хориҷи кишвар рӯ оварда, асосан Русияро макони муҳоҷират интихоб мекунанд.

Бино ба маълумоти мақомоти муҳоҷирати Русия, айни замон ҳудуди 1 млн. шаҳрвандони Тоҷикистон дар қаламрави ин кишвар қарор доранд.

Дар ҳамин ҳол, тибқи маълумоти Агентии омори назди президенти ҶТ, нимсолаи аввали соли ҷорӣ дар ҷумҳурӣ беш аз 77,4 ҳазор ҷойҳои кории нав таъсис дода шудааст, ки аз ин миқдор зиёда аз 44 ҳазор ҷойҳои кориро шахсони хусусӣ таъсис додаанд.