Гурӯҳи корӣ таҳти раҳбарии сардори шуъбаи муносибатҳои байнулмилалӣ ва ташкили ҳаҷи Кумита оид ба корҳои дин, танзими анъана ва ҷашну маросимҳои милии назди ҳукумати ҷумҳурӣ Абдуғаффор Юсуфов ба шаҳрҳои Макка ва Мадинаи Арабистони Саудӣ раҳсипор шуд.

Бино ба маълумоти АМИТ «Ховар» , ҳадафи сафари гурӯҳи мазкур, ки кормандони масъули Кумита, табибон, ошпазон ва чанде роҳбаладон ба он шомиланд, иҷрои корҳои омодагӣ вобаста ба истиқбол ва ҷобаҷогузории ҳоҷиёни Тоҷикистон мебошад.

Гуфта мешавад, айни замон меҳмонхонаҳои шаҳрҳои Маккаи мукаррама ва Мадинаи мунаввара барои қабули ҳоҷиён омода гардидаанд ва дар назар аст, ки шуруъ аз 21-уми август гурӯҳҳои нахустини ҳоҷиёни Тоҷикистон аз самтҳои Душанбе ва Хуҷанд ба Мадинаи мунаввара сафарбар гарданд.

Зимнан зикр мегардад, ки 24-уми август сафарбарнамоии ҳоҷиёни Тоҷикистон ба Маккаи мукаррама оғоз меёбад.