Комиссияи иборат аз намояндагони Кумитаи дин ва Шӯрои уламои Тоҷикистон савияи дониши имомхатибони кишварро санҷида, даҳҳо нафари онҳо аз мақомҳояшон барканор шуданд.

Шумори дақиқи имомхатибони масҷидҳои панҷвақта, ки аз имтиҳон нагузаштанд, алҳол номбар намешавад. То имтиҳон, ки охири моҳи декабр шурӯъ шуд, шумори имомхатибони масҷидҳои ҷумҳурӣ 265 нафарро ташкил медод.

Аз Кумитаи дин ба «Азия-Плюс» дар ин робита иттилоъ доданд, ки чанде аз имомхатибон ба аксари саволҳо, аз ҷумла қоидаҳои адои намоз мувофиқи мазҳаби Имоми Аъзам ва дигар масъалаҳои фиқҳӣ ҷавоб дода натавонистаанд.

Зимнан зикр гардид, ки санҷиши савияи дониши 3 ҳазор имомхатибони масҷидҳои панҷвақта ба наздикӣ оғоз мегардад. Имтиҳонгирӣ аз имомхатибон дар Тоҷикистон тӯли 9 соли охир гузаронида мешавад.

Чанде аз имомхатибон, ки аз имтиҳон нагузаштаанд, бар ин назаранд, ки аз фаъолияти динӣ ноадолатона барканор шудаанд. Мансабдорон мегӯянд, вазифаи имомхатиб танҳо аз хондани намозу мавъиза иборат набуда, бояд барои муассисаи динӣ ва ибодаткунандагон низ шароити мусоид фароҳам оварда шавад.

Аз соли 2014 давлат ба имомхатибон дар ҳаҷми 800 сомонӣ (наздики 100 доллар) маош муқаррар намуда, хароҷоти нигаҳдориву ободонии масҷидҳо аз ҳисоби хайрияҳои ибодаткунандагон ҷуброн мешавад.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.