Сафири Тоҷикистон дар Қоҳира Хусрав Нозирӣ бо раиси Шӯрои мудирони Китобхона ва бойгонии миллии Миср Аҳмад Шавкӣ дидору гуфтугӯ намуд.

Бино ба иттилои Вазорати корҳои хориҷии ҷумҳурӣ, дар мулоқот масъалаҳои барқарор намудан ва густариш додани ҳамкорӣ байни китобхонаҳову марказҳои дастхатҳои ду кишвар меҳвари баррасӣ шуда, Аҳмад Шавкӣ пешниҳод намуд, ки байни Китобхона ва бойгонии миллии Миср ва ниҳодҳои ҳамтои он дар Тоҷикистон ёддошти тафоҳуми ҳамкорӣ ба имзо  расад.

Зикр мегардад, ки Китобхонаи миллии Миср бо фармони Хидев Исмоил 23 марти 1870 ба манзури ҳифзи дастхатҳои арабӣ ва шарқӣ таъсис ёфта буд. Ҳоло дар Китобхонаи мазкур беш аз 57 ҳазор дастхати гаронбаҳо нигаҳдорӣ мешавад.

Дар Китобхона ганҷинаи дастхатҳои форсӣ-тоҷикӣ ҷойгоҳи вежа дорад, ки теъдоди он тақрибан ба 10 ҳазор дастхат мерасад. Дар миёни онҳо 71 дастхати нодири форсӣ-тоҷикии мусавварҳастанд, ки таърихи китобат ва тасвири онҳо қарнҳои XIV ва XIX мелодиро фаро мегирад.