Сокинони манзили кӯчаҳои Бухоро №29, Истаравшан №21 ва №25 аз болои ширкати «Муҳаммад-2009» ба мақомоти шаҳрдории Душанбе шикоят бурданд.

Ин ширкат се сол пеш хонаҳои онҳоро кӯчонида, сохтмони хонаи баландошёнаро дар ин ҷо ба итмом нарасонидааст. Сокинони хонаҳо, ки дар мавзеи назди бинои Хадамоти гумрук воқеъ аст, бо раҳбарияти шаҳрдорӣ вохӯрданд.

- Зимни вохӯрӣ бо муовини аввали раиси пойтахт мо изҳор доштем, ки бо вуҷуди ваъдаҳои сершумор, ширкати «Муҳаммад-2009» сохтмони хонаи баландошёна дар кӯчаи Бухороро ба итмом нарасонид. Пулҳое, ки ба мо ҷудо мекунанд, барои иҷораи хона кофӣ нест. Аксарияти сокинони хонаҳои кӯчонидашуда имрӯз дар кӯча бесарпаноҳ мондаанд, - мегӯяд собиқ сокини манзили Истаравшан 21 Олга Гускова.

Asia-Plus

Ба қавли собиқ сокини кӯчаи Бухоро №29 Таҳмина Абдураҳимова, кӯчонидани хонаҳои онҳо моҳи январи соли 2015 шурӯъ шуд.

- Дар ин ҷо ба сохтмони хонаи 18-ошёна бо номи Zar Palace оғоз карданд. Аввали кор ҳамааш хуб буд. Ба мо пешакӣ барои муваққатан иҷора гирифтани хона барои 10 моҳ пул (400-450 доллар барои 1 моҳ) дода, ваъда карданд, ки семоҳаи сеюми соли 2017 сохтмони хона ба анҷом мерасанд ва аз он ба мо хона медиҳанд, - иброз дошт ӯ.

Тарҳи (макети) Zar Palace

Ба гуфтаи номбурда, сипас ширкат ба мушкилоти молӣ дучор гардида, айни замон корҳои сохтмонӣ бурда намешаванд.

- Пули иҷорароо бошад, бо дермонӣ ва ҳамагӣ 1000-200 доллар барои 1 моҳ медиҳанд, ки ин миқдор пул барои иҷораи манзил намерасад. Мо маҷбур шудем, ки қарз гирем ва дар ниҳояти кор дар кӯча бесарпаноҳ мондем. Дигар илоҷе наёфта, чанде аз оилаҳо дар дафтари кории ширкат дар ин хона зиндагӣ мекунанд, - илова кард зан.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.