Дар меҳмонхонаи «Шератон» имрӯз Форуми минтақавии соҳибкорзанон оғоз мегардад, ки беш аз 200 нафар занони тоҷирро дар соҳаҳои ҳунармандӣ ва сайёҳӣ аз минтақаи Осиёи Марказӣ ва Афғонистон гирдиҳам меорад.

Чорабинии мазкур аз ҷоиби Кумитаи давлатии сармоягузорӣ ва идораи амволи давлатии ҶТ, Асссотсиатсияи миллии тиҷорати хурду миёна дар Тоҷикистон, сафорати ИМА дар ҶТ, Бонки аврупоии таҷдиду рушд, Бонки осиёгии рушд ва USAID созмон дода мешавад.

Ба гуфтаи дастандаркорони чорабинӣ, ба муносибати Соли рушди сайёҳӣ ва ҳунарҳои мардумӣ дар Тоҷикистон форуми имсола ба мавзӯи «Сайёҳӣ ва ҳунармандӣ» бахшида шудааст.

Дар доираи кори форум барои соҳибкорзанон, намояндагони ташкилотҳои ҷамъиятӣ ва дигар ҷонибҳои манфиатдор машғулиятҳои кушод гузаронида мешаванд. Иштирок дар машғулиятҳо бепул ва тибқи пешакӣ номнавис шудан сурат мегирад.

Ин машғулиятҳоро намояндагони Қазоқистон, Ӯзбекистон, Туркманистон, Арманистон, Олмон ва Тоҷикистон барпо мекунанд.

Рӯзҳои 6-7 апрел намоишгоҳи молу маҳсулоти занони ҳунарманди Тоҷикистону Қирғизистон доир мегардад, ки дарҳояш барои ҳамаи хоҳишмандон боз аст.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.