Раиси шаҳри Душанбе Рустами Эмомалӣ дар бораи «Кушодашавии мавсими мототсиклронӣ-2018» қарор ба имзо расонид.

Бино ба иттилои дафтари матбуоти мақомоти шаҳрдории пойтахт, ба клуби мототсиклронҳои «Ирбис МСС Тоҷикистон» барои баргузор намудани чорабиниии «Кушодашавии мавсими мототсиклронӣ-2018» санаи 27 апрели соли 2018, аз соати 10:00 то соати 12:00 иҷозат дода шуд.

Макони ҷамъшавӣ ва бақайдгирии иштирокчиён дар Муассисаи давлатии «Наврӯзгоҳ» аз соати 10:00 то 11:00 муайян шуда, ҳаракати қатораи иштирокчиён бо мушоиати автомобилҳои роҳбонии шуъбаи БДА Раёсати ВКД ҶТ дар шаҳри Душанбе аз хиёбони Ҳофизи Шерозӣ ба самти кӯчаи Карамов - хиёбони Рӯдакӣ, гардиш ба тарафи рост то чорроҳаи хиёбони Рӯдакӣ - кӯчаи Бухоро, гардиш ба кӯчаи Бухоро - Турсунзода, гардиш ба тарафи рост - кӯчаи Шоҳтемур, ҳаракат то роҳи ҳалқавии гардиши ҶСК «Комбинати хӯроквории Тоҷикистон» ва баромад ба кӯчаи Дӯстии халқҳо то «Боғи «Ғалаба» ва нигоҳдории  ҷангал»-и шаҳрдории Душанбе сурат мегирад.

Ба сохторҳои дахлдори дастур дода шуд, ки ҷиҳати таъмини тартиботи ҷамъиятӣ, бехатарии ҳаракат дар роҳ, амнияти шаҳрвандон, хизматрасонии «Ёрии таъҷилии тиббӣ» ва риояи Маромномаи сокини пойтахт зимни баргузории чорабинӣ тадбирҳои заруриро роҳандозӣ намоянд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.