Раиси шаҳри Душанбе Рустами Эмомалӣ дар бораи рӯзҳои 18-19 августи соли равон дар маҷмааи «Наврӯзгоҳ баргузор намудани Фестивали тобистонаи Душанбе қарор ба имзо расонид.

Бино ба маълумоти дафтари матбуоти мақомоти шаҳрдории пойтахт, қарори мазкур бо мақсади муаррифӣ намудани шаҳри Душанбе ҳамчун симои сайёҳии кишвар ва фароҳам овардани имконият ҷиҳати таъмини фароғату саёҳати сокинону меҳмонони пойтахт амалӣ мешавад.

Гуфта мешавад, дар доираи чорабиниҳои фестивал ташкили намоишгоҳу ярмаркаҳои ҳунарҳои мардумӣ, консерту намоишномаҳои театрии устодони санъати ҷумҳурӣ, вохӯрӣ бо шоирону нависандагон ва шахсони маъруфи ҷумҳурӣ дар назар аст.

Барои онҳое, ки дар макони баргузории чорабиниҳо ҳузур дошта наметавонанд, ҷараёни фестивал дар мониторҳои насбшуда дар нуқтаҳои гуногуни шаҳр намоиш дода мешавад. Фестивали тобистона анъанавӣ шуда, минбаъд ҳамасола гузаронида хоҳад шуд.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.