Дар озмуни дастархонороӣ беҳтарин, ки бо супориши Президент Эмомалӣ Раҳмон баргузор гардид, ноҳияҳои Шоҳмансури Душанбе ва Мурғоби ВМКБ мақоми аввалро соҳиб шуданд, хабар медиҳад маркази матбуоти Кумитаи дини Тоҷикистон.

Мақомоти иҷроияи ноҳияҳои ғолибгардида ғайр аз диплом, ҳамчунин 10 ҳазор сомонӣ туҳфа гирифтанд.

Мақоми дуюмро ноҳияҳои Бобоҷон Ғафуров ва Шаҳринав ишғол карданд ва соҳиби 5 ҳазор сомонӣ туҳфа шуданд. Мақомои сеюм насиби шаҳри Бохтар, ноҳияҳои Варзоб ва Рашт гардид, ки онҳо 3 ҳазор сомонӣ туҳфа гирифтанд.

“Ҳакамони озмун ҳангоми баҳогузорӣ ба зебогии дастархони ороста, хӯрокҳои миллии дар он гузошташуда ва риояи одатҳои миллӣ таваҷҷуҳ карданд”,- гуфта мешавад дар иттилои паҳннамудаи Кумитаи мазкур.

Ёдовар мешавем, ки охири соли гузашта Президент Эмомалӣ Раҳмон дар хусуси баргузор кардани озмуни ҷумҳуриявии дастархонороӣ фармон содир намуд. Ҳадафи баргузории озмуни мазкур тарғиби арзишҳои миллии тоҷикон, хӯрокҳои тоҷикӣ гуфта мешавад.

Ташкилкунандагони ин озмун Кумитаи дин, танзими анъана ва ҷашну маросимҳои Тоҷикистон ва мақомотҳои иҷроияи маҳаллӣ мебошанд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.