Шумори расмии гирифторон ба бемории Вируси норасоии масунияти одам (ВНМО, ВИЧ) дар муассисаҳои ислоҳии Тоҷикистон 307 нафарро ташкил медиҳад, қайд мешавад дар гузориши соли 2018-и Ваколатдор оид ба ҳуқуқи инсон дар Тоҷикистон.

Дар гузориш зикр мегардад, ки сатҳи баланди маргумир ва гирифторӣ ба бемориҳои сироятӣ мушкилоти асосии муассисаҳои ислоҳии Тоҷикистон мебошанд.

“Соли гузашта 4 ҳазору 600 нафар маҳбусон аз санҷиши гирифторӣ ба ин беморӣ гузашта, боз 30 нафар шахсони нави ба он мубталошуда ошкор шуданд, ки 262 нафарашон бо табобат фаро гирифта шудаанд”, - омадааст дар гузориш.

Аз гузориш бармеояд, ки соли 2018 дар муассисаҳои ислоҳии ҷумҳурӣ 173 ҳодисаи нави сироят ёфтан аз бемории сил ба қайд гирифта шудааст.

Гуфта мешавад, сол то сол шароити будубоши маҳбусон ва муносибати кормандони муассиса ба онҳо хубтар мешавад.

Бо мақсади беҳтар намудани вазъи риояи ҳуқуқҳои инсон дар муассисаҳои пӯшида ё қисман пушида, Ваколатдор оид ба ҳуқуқи инсон (Омбудсмен) дар Тоҷикистон ташкили корҳои шарҳу тавзеҳро дар бораи меъёрҳои байнулмилалӣ ва дохилӣ, ҳамчунин мунтазам баргузор кардани пайгирӣ (мониторинг)-и фаъолияти чунин муассисаҳоро тавсия медиҳад.

Қобили зикр аст, ки чунин гузориш бори нахуст замони сари мансаб омадани Ваколатдори нав Умед Бобозода, ки аввали моҳи март бо фармони президент ба ин вазифа таъин шуд, ба чоп расид. То ин дам муддати 10 сол ин вазифаро Зариф Ализода бар дӯш дошт.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.