Дар бозори суғуртаи ҷумҳурӣ ширкати нав ҶДММ “Ташкилоти суғуртавии Такаффул” сабт шуд.

Иҷозатнома ба ширкати “Такаффул” бар асоси қарори Раёсати Бонки миллии Тоҷикистон (БМТ) аз 7 майи соли равон дода шуд, хабар медиҳад шуъбаи матбуоти Бонки миллӣ.

Иҷозатнома ба ин ширкат барои амалисозии фаъолияти суғуртавии ихтиёрӣ ба муҳлати 5 сол дода шудааст.

Гуфта мешавад, ба Идораи назорати суғуртавӣ дастур дода шудааст, ки оид ба қарори мазкур сабти дахлдорро ба Феҳристи ягонаи давлатии иштирокчиёни касбии бозори суғурта ворид намояд.

Ҳамин тариқ, акнун дар бозори суғуртаи ҷумҳурӣ (бо назардошти иштирокчии нав) 20 ширкат (17 ғайридавлатӣ, 2 давлатӣ ва 1 маркази дастгирии мутақобилаи суғуртавӣ) амал мекунанд.

Ширкатҳои нисбатан бузургтар аз рӯи ҳаҷми сармояи оинномавӣ ҶСДММ «Спитамен-Суғурта» (87,7 млн. сомонӣ), КВДС «Тоҷиксармоягузор» (15,6 млн. сомонӣ), КВД «Тоҷиксуғурта» (5,2 млн. сомонӣ), ҶДММ «ҶС «Муин» (2,4 млн. сомонӣ) маҳсуб меёбанд.

Бино ба маълумоти Бонки миллӣ, соли 2018 ширкатҳои суғуртавӣ бо мизоҷон беш аз 1,8 млн. адад шартномаҳо ба имзо расонидаанд. Ширкатҳои суғуртавӣ дар маҷмӯъ ба маблағи беш аз 234 млн. сомонӣ суғуртапулӣ ҷамъоварӣ карда, пардохти қариб 74% аз ин суғуртапулиҳо бо навъҳои ихтиёрии суғурта сурат гирифтааст.

Ҳаҷми пардохти суғуртапулӣ аз ҷониби ширкатҳо ба мизоҷон дар соли гузашта ҳамагӣ каме бештар аз 10,6 млн. сомониро ташкил додааст.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.