Рӯзҳои 24-26 октябр дар пойтахт Намоишгоҳи байнулмилалии универсалии “Тоҷикистон – 2019. Тирамоҳ” доир мешавад.

Тавре маркази матбуоти Палатаи савдо ва саноати ҷумҳурӣ хабар медиҳад, дар намоишгоҳи мазкур молу маҳсулоти бахшҳои энергетика, нақлиёт, саноатҳои сабук ва кимиё, кӯҳкорӣ, мошинсозӣ, металлургия, кишоварзӣ, тандурустӣ, сайёҳӣ ва ғайра ба фурӯшу маърази тамошо гузошта мешаванд.

Намоишгоҳ майдони 1000 метри мураббаъро фаро гирифта, дар он ширкатҳои истеҳсолии ватанӣ ва хориҷӣ, аз ҷумла, аз кишварҳои Ӯзбекистон, Афғонистон, Чин, Қазоқистон, Русия ва Эрон маҳсулоти худро пешниҳод мекунанд.

Маросими расмии ифтитоҳи намоишгоҳ соати 10-и рӯзи 24-уми октябр дар маҷмааи варзишии "Манеж" баргузор шуда, ҳамин рӯз ҳамоиши сеҷонибаи доираҳои тиҷоратии Тоҷикистону Афғонистон ва Белорус доир мегардад. Рӯзи 25-уми октябр боз як ҳамоиши намояндагони ширкатҳои иштирокдор барпо мешавад.

Намоишгоҳи байнулмилалии мазкур ҳамасола дар Тоҷикистон баргузор мешавад. Дар соли ҷорӣ он дуюмин намоишгоҳ-ярмаркаи байнулмилалӣ буда, аввалаш рӯзҳои 28-31 март дар Душанбе доир гардида буд.

Бино ба маълумоти Палатаи савдо ва саноати ҷумҳурӣ, ҳадаф аз баргузории намоишгоҳҳо таҳким ва густариши ҳамкории иқтисодӣ, дастгирии соҳибкорон барои дарёфти робитаҳои тиҷоратӣ, канори ҳам овардани намояндагони доираҳои тиҷорат ва савдо, сохторҳои давлатӣ, созмонҳои байнулмилалию ташкилотҳои ҷамъиятӣ баҳри роҳандозии равобити мутақобилан судманд, дарёфти самтҳои нави савдо ва густариши ҳаҷми муомилоти молии дуҷониба мебошад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.