Дар доираи сафари расмӣ ба Ӯзбекистон раиси шаҳри Душанбе Рустами Эмомалӣ ба шаҳри Самарқанд ташриф оварда, аз маҷмааи Ҳазрати Хизр боздид кард.

Бино ба маълумоти ВАО-и Ӯзбекистон, дар ин ҷо ӯ назди оромгоҳи аввалин раисҷумҳури Ӯзбекистон Ислом Каримов дастагул гузошта, дуою фотиҳа хонд.

Сурат: АМИТ "Ховар"

Шаҳрдори пойтахти Тоҷикистон инчунин аз маҷмааи меъморӣ – мақбараи Имом Бухорӣ боздид кард.

Сурат: АМИТ "Ховар"

Тавре дафтари матбуоти раиси шаҳри Тошканд хабар медиҳад, то сафар ба Самарқанд шаҳрдори Душанбе, президенти Федератсияи футболи Тоҷикистон Рустами Эмомалӣ аз варзишгоҳи “Миллий”-и Тошканд, ки тими “Бунёдкор” ва мунтахаби футболи Ӯзбекистон бозиҳояшонро дар он мегузаронанд, боздид кард.

Рустами Эмомалӣ бо шароити варзишгоҳ барои футболбозону тамошобинон, ҳамчунин зимни боздид аз осорхонаи варзишгоҳи “Миллий” бо аксҳои Нуриддин Амриев – футболбози собиқадори тоҷики дастаи “Пахтакор” шинос шуд.

Дар варзишгоҳ вохӯрии кории Рустами Эмомалӣ бо ноиби президенти Ассотсиатсияи футболи Ӯзбекистон, собиқ довари маъруфи ӯзбек Равшан Ирматов баргузор шуд.

Сурат: Ҳокимияти Тошканд

Президенти Федератсияи футболи Тоҷикистон Рустами Эмомалӣ, ки аз моҳи апрели соли 2019 ҳамзамон роҳбарии Ассотсиатсияи футболи Осиёи Марказиро ба зимма дорад, ба рушди минбаъдаи футбол дар минтақа ва ташкили вохӯриҳо байни дастаҳои минтақа изҳори умедворӣ кард.

Ноиби президенти Ассотсиатсияи футболи Ӯзбекистон Равшан Ирматов, ки бозиҳои се чемпионати охири ҷаҳонро ҳакамӣ кардааст, ба Рустами Эмомалӣ либос (футболка)-и рақами 7-и футболбози мунтахаби Ӯзбекистонро туҳфа кард.

Сурат: Ҳокимияти Тошканд

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.