Бо дастури сарвазири мамлакат Қоҳир Расулзода аз 1-уми август дар тамоми шаҳру ноҳияҳои Тоҷикистон ярмаркаи фурӯши либос ва дигар маводи зарурии мактабӣ шурӯъ мешавад.

Бино ба иттилои Вазорати маориф ва илми ҶТ, дар ин робита ба Иттифоқи «Тоҷикматлубот» ҷиҳати ройгон ҷудо кардани нуқтаи алоҳида барои баргузории ярмарка ва ба мақомоти иҷроияи ҳокимияти давлатии вилоятҳо ва шаҳру ноҳияҳои кишвар барои дар сатҳи хуб гузаронидани он супориш дода шудааст.

Дӯхти либоси мактабиро корхонаҳои дӯзандагӣ дар асоси талаботи Дастурамали либосҳои тавсияӣ барои хонандагони муассисаҳои таҳсилоти умумӣ, ки аз ҷониби Вазорати маориф ва илм таҳия шудааст, роҳандозӣ мекунанд.

Инчунин бо мақсади ба роҳ мондани истеҳсоли маҳсулоти босифат аз ҷониби Агентии стандартизатсия, метрология, сертификатсия ва нозироти савдои назди Ҳукумати ҶТ стандарти Ҷумҳурии Тоҷикистон «Либосҳои мактабӣ – шартҳои умумии техникӣ» бо қайди давлатӣ СТ ҶТ 1110-2018 таҳия гардида, ба корхонаю коргоҳҳои соҳа ҷиҳати дар асоси он истеҳсол кардани молу маҳсулот пешниҳод шудааст.

Тибқи иттилои Вазорати саноат ва технологияҳои нави ҶТ, дар миқёси ҷумҳурӣ иқтидори корхонаҳои дӯзандагӣ баҳри пурра таъмин кардани хонандагон бо либоси мактабӣ басанда мебошад. Гуфта мешавад, ки дар ҳолати назорати ҷиддии масъулин имкони истеҳсоли либоси мактабӣ дар корхонаҳо давоми сол фароҳам оварда шуда, хонандагон ба пуррагӣ бо маҳсулоти воридотивазкунандаи хушсифат таъмин мегарданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.