Имрӯз даври ҷамъбастии озмуни ҷумҳуриявии “Фурӯғи субҳи доноӣ китоб аст” дар Китобхонаи миллии Тоҷикистон оғоз шуд, ки аз 7-ум то 15-уми декабр давом мекунад.

Дар даври ҷамъбастии ин озмун дар назар аст 268 довталаб, 9 нафар аз ВМКБ, 59 нафар аз вилояти Суғд, 79 нафар аз вилояти Хатлон, 58 нафар аз шаҳри Душанбе ва 62 нафар аз ноҳияҳои тобеи ҷумҳурӣ ширкат кунад.

Даври ҷамъбастии ин озмунро Вазорати маориф ва илм баргузор мекунад.

Мутобиқи ҷадвале, ки Дастгоҳи иҷроияи Президент  таъйид кардааст озмун барои ширкаткунандагони ҳар минтақа дар рӯзҳои алоҳида баргузор хоҳад  шуд. Аз ҷумла барои ВМКБ рӯзи 7-уми декабр, барои вилояти Суғд рӯзҳои 7-8 декабр, барои Хатлон рӯзҳои 9-10-11-уми декабр, барои НТҶ рӯзҳои 12-13-уми декабр ва барои ширкаткунандагони шаҳри Душанбе рӯзҳои 13-14-15-уми декабри соли ҷорӣ ҳамарӯза аз соати 9:00 то 16:00 доир мегардад.

Озмуни "Фурӯғи субҳи доноӣ китоб аст" бо дастури Президенти Тоҷикистон имсол бори дувум аст, ки баргузор мешавад. Соли гузашта бори нахуст ин озмун доир шуда буд. Ин озмун аз моҳи январ то моҳи декабр дар чор давр баргузор мешавад.

Дар он хонандагону донишҷӯён ва магистрону аспирантҳову докторантҳо иштирок карда метавонанд. Имсол маҳдудияти синнусолӣ дар он бардошта шуд. Ғолибони ин озмун дар чор давр муайян ва аз сӯйи ҳукуматҳои маҳаллӣ қадрдонӣ мешаванд. Ба ғолибони давраи чорум аз ҷониби президент тӯҳфа ва мукофотпулӣ дода мешавад.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.