Нависанда Равшан Махсумзод дар Анҷумани XV-уми Иттифоқи нависандагони Тоҷикистон муовини нави раиси ин созмон интихоб шудааст. Равшан Махсумзод дар ин симат ба ҷойи нависандаи хушноми тоҷик Юнус Юсуфӣ омад, ки  гуфта мешавад ӯ ба далели бознишастагӣ аз ин мақом рафтааст.

Равшан Махсумзод нависанда ва рӯзноманигори тоҷик аст, ки то омадан ба ин мақом мудири бахши насри Иттифоқи нависандагон буд. 

Дирӯз дар ин анҷуман раиси Иттифоқи нависандагон Низом Қосим ва муовини аввали ӯ Ато Мирхоҷа дубора дар симатҳои худ барои панҷ соли дигар интихоб шуданд. 

Ҳамчунин дар Анҷумани XV-уми Иттифоқи нависандагони Тоҷикистон Раёсати нави ин созмони эҷодӣ иборат аз 47 нафар интихоб шудааст, ки чеҳраҳое нав чун Абдуллоҳ Раҳнамо, Исмоил Зарифӣ, Толиби Луқмон, Муҳриддин Сабурӣ ба узвияти он расидаанд. 

Ин Анҷуман ҳамчунин мебоист сардабирони нашрияҳои ин созмонро низ интихоб мекард, вале ба далели тағйирот дар оиннома акнун сардабирони нашрияҳоро Раёсати созмон интихоб мекунад. 

Ҳоло Рустам Ваҳҳобзода сардабири маҷаллаи миллии адабии "Садои Шарқ", Парда Ҳабиб сардабири ҳафтаномаи "Адабиёт ва санъат" ва Ҷумъа Қуддус сардабири маҷалаи русии "Памир" мебошанд, ки органҳои нашаротии Иттифоқи нависандагонанд. 

Иттифоқи нависандагони Тоҷикистон як созмони эҷодии вомонда аз даврони Шӯравӣ дар Тоҷикистон аст, ки аз сӯйи ҳукумати Тоҷикистон маблағгузорӣ мешавад.

Иттифоқи нависандагон дар замони шӯравӣ яке аз ниҳодҳои муътабари ҷамъиятӣ дониста мешуд, ки раиси он дар ҷомеа аз мақом ва нуфузи болое бархӯрдор буд. Хусусан замони раисии шоирони варзидае чун Мирзо Турсунзода ва Муъмин Қаноат он яке аз ниҳодҳои муҳими идеологии Тоҷикистони Шӯравӣ ба ҳисоб мерафт. Дар соли 1991 интихоби раиси ин ниҳод яке аз пурбаҳстарин интихоботҳо буд, ки он замон Лоиқ Шералӣ ва Аскар Ҳаким номзади асосӣ буданд, ки интихобот бо пирӯзии Аскар Ҳаким натиҷагирӣ шуд.

Иттифоқи нависандагони Тоҷикистон соли 1934 таъсис ёфтааст ва то кунун онро Абулқосим Лоҳутӣ, Саид Носиров, Нодир Шанбезода, Сотим Улуғзода, Мирзо Турсунзода, Муъмин Қаноат, Аскар Ҳаким, Меҳмон Бахтӣ раҳбарӣ кардаанд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.