Расонаҳои русӣ бо такя ба Ситоди  мубориза бо коронавирус дар Русия хабар медиҳанд, ки ин кишвар аз 27 августи соли равон шумораи парвозҳои мустақимашро ба Тоҷикистонро афзоиш медиҳад. Вале Оҷонсии ҳавонавардии шаҳрвандии Тоҷикистон мегӯянд, ҳоло чизе маълум нест.

Хабаргузории “ТАСС” иттилоъ медиҳад, ки Ситоди мубориза бо коронавирус дар Русия тасмим гирифтааст, ки аз 27 август шумораи парвозҳои мустақими Русия бо Маҷористон, Кипр, Қирғизистон ва Тоҷикистонро афзоиш диҳад.

Манбаъ менависад, ки ҳафтае 7 парвоз аз Маскав ба Бишкек ва Душанбе имконпазир хоҳад шуд.

- Илова бар ин, аз як қатор шаҳрҳои Русия ба пойтахти Қирғизистон ва инчунин аз Русия ба фурудгоҳҳои Душанбе, Хуҷанд ва Кӯлоб дар як ҳафта як парвоз иҷозат дода мешавад, - менависад хабаргузории мазкур.

Дар ҳамин ҳол, Оҷонсии ҳавонавардии шаҳрвандии Тоҷикистон мегӯяд, ки ҳоло чизе маълум нест.

"Мо ягон огоҳӣ нагирифтаем. То ҳол мактуби расмӣ ҳам равон накардаанд",- гуфтанд аз ин ниҳод ба "Азия-Плюс".

Ба гуфтаи манбаъи мо дар ин ниҳод, дар чунин мавридҳо, Русия бояд онҳоро ба василаи мактуб огоҳ кунад.

Ёдовар мешавем, мудири Оҷонсӣ Икром Субҳонзода, рӯзи 27 июл дар як нишасти хабарӣ гуфт, ки танҳо дубора  оғоз шудани парвозҳои мунтазам ба Русия метавонад нархи парвозҳои ҳавоӣ ба ин кишварро коҳиш диҳад.

Дар ҳоли ҳозир арзиши чиптаҳои ҳавопаймо ба шаҳрҳои Русия аз Самарқанд, Тошканд, Ӯш ва Бишкек назар ба нархҳо аз Тоҷикистон ба ин кишвар, ду маротиба арзонтар аст. Дар ин робита шаҳрвандони Тоҷикистон барои расидан ба шаҳрҳои Русия аз фурудгоҳҳои кишварҳои ҳамсоя истифода мекунанд.

Ба гуфтаи Субҳонзода, пеш аз пандемия ба шаҳрҳои Русия дар як ҳафта то 34 парвози мустақим анҷом дода мешуд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.