Вазорати корҳои дохилии Тоҷикистон дар шарҳи ҳодисаи зери чархи трактор мондани хонандаи мактаб дар ноҳияи Зафаробод зимни пахтачинӣ гуфт, дар таркиби ҳодиса аломатҳои ҷиноят дида намешавад ва вобаста ба ин ҳодиса парванда боз нашудааст.

Аз маркази матбуоти ВКД  ва Раёсати ВКД дар вилояти Суғд ба “Азия плюс” гуфтанд, ки ҳодиса бо айби худи духтар сурат гирифтааст ва ӯ зимни давида савор шудан ба ядаки (прицеп) трактор  афтида ҷон додааст.

“Ҳамчун ҳодисаи нохуш ба қайд гирифта шудааст. Дар ин ҳодиса таркиби ҷиноят нест ва барои ҳамин парвандаи ҷиноятӣ боз намешавад”, - шарҳ доданд аз ВКД.

Модар: “Омӯзгорон ва соҳибони замин ҷазо бинанд”

Дар ҳамин ҳол модари Меҳронаи Фурӯзон, Гулсара Назирова даъво дорад, ки ҳодиса бо айби омӯзгорон ва соҳибони замин сар задааст ва бигзор нисбати гунаҳкорон чораи қонунӣ андешида шавад.

“Бо гузашти беш аз як ҳафтаи ҳодиса касе аз мақомоти корҳои дохилӣ ё прокуратура ба санҷиши қазия наомадаанд. Рӯзи 20-уми сентябр ба мақомоти прокуратураи ноҳияи Зафаробод рафта ариза навиштам. Дар ариза нисбати омӯзгорон, соҳибони замин хостам чораи қонунӣ андешида шавад ва ҷазо гиранд. Ман ин духтарамро 15 сол бо чи азобу машаққат, бепадар калон кардам. Азобҳоямро ҳама медонад. Ҳоло ягон кас ҳодисаро аз мо омада напурсид, ки чӣ шуду чӣ монд”, - шикоят кард Назирова.

Гулсара мегӯяд, талош мекунад омилони аслии ҳодиса ҷазои сазоворро гиранд.

“Ман то охир меравам, ба Прокуратураи вилояти Суғд ҳам ариза менависам, то ҳодиса таҳқиқу гунаҳкорон ҷазо бинанд”, - мегӯяд модари Меҳрона.

Ёдовар мешавем, ки бегоҳии 14-уми сентябр Меҳронаи Фурузон, хонандаи синфи 9-и мактаби рақами 2-и ноҳияи Зафаробод дар майдони пахтаи Хоҷагии ёрирасони мақомоти милитсия дар ин ноҳия зери чархи трактор монда ҷон бохт.

Шоҳидон чӣ гуфтанд?

Гулсара Назирова баъди дар суҳбат бо “Азия-Плюс” аз қавли ҳамсинфони духтараш гуфта буд, ки ронанда бехабар аз хонандагон, ки назди ядак (притсеп) дар торикӣ интизори бозгашт ба хона буданд, тракторро идора кардааст.

“Шоҳидони ҳодиса ду ҳамсинфаш ҳастанд. Яке аз онҳо гуфт ронанда тракторро тез аз ҷой ба ҳаракат даровард ва ядаки он ба китфи Меҳрона расида ӯро ба замин афтонд. Дар торикӣ ронанда надидаст ва трактор аз болои духтарам гузашта рафтаст. Муаллима он вақт дар назди ин хонандаҳо набудаст, ҳарчанд ӯ бояд хонандагонро сарҷамъ мекард”, - гуфта буд Гулсара Назирова.

Ба қавли ӯ, “омӯзгорони мактаб шабона хонандагонро ҷамъ карда гуфтаанд, ки касе шуморо пурсад гӯед, ки мо назди Меҳрона набудем ва ӯро надидаем”.

Он замон мақомоти корҳои дохилии вилояти Суғд гуфта буданд, ки аз ин ҳодиса хабар надоранд ва чунин ҳодиса дар мақомоти онҳо сабт нашудааст.

Мудири маорифи ноҳияи Зафаробод Дилафрӯз Ниёзқулова  дар аз шарҳи ҳодиса худдорӣ карда кӯтоҳ гуфта буд, ки “ин хонандагон бо хоҳиши худашон баъди дарс ба хоҷагӣ барои ёрдам пахтачинӣ рафтанд”.