Сафорати Русия дар Тоҷикистон аз 29 август қабули аризаҳоро барои додани шиноснома дар хориҷи кишвар бо муҳлати амалашон 10 сол ва дорои микрочип бо маълумоти биометрии соҳиби он муваққатан қатъ кард. Дар ин бора дар сомонаи сафорат хабар дода мешавад.

Тавре ки Вазорати корҳои хориҷии Русия хабар медиҳад, аз 26 август бо сабабҳои техникӣ дар тамоми кишварҳо додани шиносномаҳои насли нав - бо ҳомили (дорандаи) маълумоти электронӣ ва 10 сол муҳлати амал муваққатан қатъ мешавад.

“Дар робита ба зарурати бозсозии шакли ҳомили электронӣ, додани ҳуҷат муваққатан манъ шуд”, - омадааст дар маълумот.

Зикр мегардад, ки анҷоми расмиёти шиносномаҳои намунаи кӯҳна бо 5 сол муҳлати амал бидуни тағйирот идома меёбад.

Дар сомонаи сафоратхонаҳои Русия дар хориҷи кишвар дар бораи мутаваққиф шудани додани шиносномаҳои биометрӣ маълумот нашр шуд. Дар ҳамин ҳол, маълум нест, ки ин маҳдудият ба шаҳрвандони дар Русия қарордошта дахл дорад ё не.

Намояндаи расмии ВКХ Русия Мария Захарова дар ин робита изҳор намудааст, ки ин тадбирҳо муваққатӣ буда, дигар кардани шакли он вобаста ба талаботи замони муосир дахл дорад.

Додани шинсонмаи намунаи нав дар Русия аз соли 2006 оғоз шуд. Аз шиносномаи кӯҳна онҳо бо доштани чипи маълумоти биометрӣ ва дигар маълумот дар бораи соҳиби он фарқ мекунанд.

Тибқи маълумоти ВКД Русия, дар Русия дар нимаи аввали соли 2022 нисбат ба ҳамин давраи соли 2021 ба шаҳрвандон 45% бештар шиносномаи хориҷӣ дода шудааст.

Дар Telegram, Facebook, Instagram, OK ва ВК бо мо бимонед.