Як саги дайду ва эҳтимолан ҳорӣ ба 16 нафар сокини шаҳри Кӯлоб ҳамла карда, ба онҳо осеб расонидааст. Дар ин бора аз Маркази санитарию эпидимиологии вилояти Хатлон хабар дода, таъкид намуданд, ки ин ҳодиса дирӯз, 12 – уми сентябр, рух додааст.

“Дар аввал 3 - 4 нафар ба беморхона бо ҷароҳатҳои гуногун муроҷиат карданд. Баъдан, аз ҳисоби мутахассисони Маркази санитарию эпидимиологии вилоят дар минтақаи Кӯлоб ва табибон гуруҳи махсус таъсис ва ҳамаи 16 нафар зарардидагон ба беморхона оварда шуданд”, - гуфт манбаъ аз Маркази санитарию эпидимиологии вилояти Хатлон.

Бино бар иттилои манбаъ, ба ҳамаи захмиён кумаки аввалияи тиббӣ расонида, ваксинаи зиддӣ бемории ҳорӣ гузаронида шуд. Айни ҳол вазъи саломатии ҳамаи зарардидагон муътадил арзёбӣ мешавад.

Ҳамчунин, саги дайду безарар ва барои ташхис ба шуъбаи Кумитаи бехатарии озуқаворӣ дар минтақаи Кӯлоб фиристода шудааст.

Дар Telegram, Facebook, Instagram, OK ва ВК бо мо бимонед.