Соли гузашта, 65 корманди соҳаи тандурустии вилояти Суғд барои роҳ додан ба камбудӣ дар вақти иҷрои вазифаҳои касбӣ ба маблағи тақрибан 45 ҳазор сомонӣ ҷарима шудаанд.

Илҳом Пӯлотзода, сардори Сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд гуфт, ин рақам нисбат ба ҳамин давраи соли 2021 қариб як баробар зиёд аст.

Илҳом Пӯлотзода, сардори Сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд
"Азия-Плюс"

Ба иттилои ӯ, дар соли 2021-ум 35 корманди тибби вилоят 25,5 ҳазор сомонӣ ҷарима шуда буданд.

Номбурда гуфт, ки дар соли 2022 инчунин, ба 70 корманди тиб муҷозоти интизомӣ гирифтаанд.

Ин масъул, сабаби муҷозот ва ҷаримаи кормандони бахши тандурустии вилояти Суғдро амалӣ нагардидани дастурамали вазифавӣ, ба роҳ монда нашудани ҳуҷҷатгузорӣ дар самти коргузорӣ, таъмин карда нашудани парвандаҳои шахсии баъзе аз кормандон, набудани назорати доимӣ тарафи маъмурияти марказ, худсоз будани ҳуҷҷатгузории шуъбаҳо, набудани китоби қайди муроҷиаткунандагони амбулаторӣ ва ғайра маънидод кард.

Ёдовар мешавем, ки соҳаи тандурустӣ бо вуҷуди ҳаётан муҳим будан ҳамасола бо ҷой доштани камбудҳо, аз ҷумла ҳолатҳои зиёди коррупсионӣ дар сархатти расонаҳо қарор мегирад. Инчунин, дар ҳисоботи омории  мақомоти коррупсия ҳамасола номи ин соҳа ҳамчун “пешсаф” зикр мегардад. 

Дар Telegram, Facebook, Instagram, OK ва ВК бо мо бимонед.