Имрӯз, 13-уми март, Эмомалӣ Раҳмон, Президенти Тоҷикистон ва Рустами Эмомалӣ, шаҳрдори Душанбе бинои Раёсати дастгоҳи марказии КДАМ ва Муассисаи таҳсилоти умумии ғайридавлатии “Мактаби ҷаҳон” (Глобал скул)-ро дар шаҳри Душанбе расман ба истифода доданд, хабар медиҳад Хадамоти матбуоти Президенти ҶТ.

Тибқи иттилои манбаъ, бинои нави Раёсати дастгоҳи марказии КДАМ дар ноҳияи Шоҳмансури пойтахт ҷойгир буда, аз се ошёна иборат аст ва бо тарҳи замонавӣ ва унсурҳои муосири шаҳрсозӣ бунёд гардидааст. Он аз ҳуҷраҳои корӣ, осорхона, маҷлисгоҳи замонавӣ ва дигар инфрасохтори соҳавӣ иборат мебошад.

“Сарвари давлат муҳтарам Эмомалӣ Раҳмон ба шароити бинои навбунёди Раёсати дастгоҳи марказии Кумитаи давлатии амнияти миллии Ҷумҳурии Тоҷикистон шинос шуда, ба сифати корҳои анҷомёфта ва фароҳам овардани шароити муносиби корӣ изҳори қаноатмандӣ намуда, кормандонро барои хизмати софдилона ба нафъи давлату миллат ва таъмини амнияти шаҳрвандон ҳидоят намуданд”, - гуфта мешавад дар хабари Хадамоти матбуоти Президенти ҶТ.

Муассисаи таҳсилоти умумии ғайридавлатии “Мактаби ҷаҳон” (Глобал скул) дар шаҳри Душанбе бошад, дар ноҳияи Фирдавсии пойтахт бунёд ёфтааст.

Гуфта мешавад, ки он бо мақсади амалӣ намудани иқдомот дар самти рушди соҳаи маориф, хоса баланд бардоштани сатҳи донишомӯзии насли наврас аз ҷониби роҳбарияти Ҷамъияти дорои масъулияти маҳдуди “Глобал Лизинг” таъсис дода шудааст.

Ин муассисаи таълимӣ аз 5 ошёна иборат мебошад ва дар масоҳати беш аз 27 садяк замин ҷойгир шудааст.

“Бинои таълимӣ дар асоси меъёрҳои байналмилалӣ бо тамоми шароити муосир таъмин карда шудааст ва дорои 28 синфхонаи муҷаҳҳази таълимии фаннӣ, аз ҷумла физика, химия, биология, технологияи информатсионӣ, 6 хуҷраи корӣ, толори фарҳангӣ бо 80 ҷойи нишаст, ошхона барои 110 нафар дар як баст, китобхона бо адабиёти гуногуну толори хониш, толори варзиш ва майдончаи варзишии тобистона мебошад”, - зикр мегардад дар хабар.

Таъкид мегардад, ки дар назди мактаби нав Муассисаи томактабӣ бо тамоми шароити зарурӣ барои 60 нафар таъсис дода шудааст.

“Кӯдакистон дар ошёнаи якуми иншоот ҷойгир буда, дорои шаш синфхонаи барҳавои машғулиятгузаронӣ ва ҳуҷраҳои хобу истироҳат барои дӯстрӯякон мебошад. Дар синфхонаҳои машғулиятгузаронӣ бо мақсади ташаккулу инкишофи кӯдакон ва тарбияи онҳо дар руҳияи ватандӯстиву хештаншиносӣ имконоти мусоид мавҷуд аст” – гуфта мешавад дар иттилои нашрнамудаи Хадамоти матбуоти Президенти ҶТ.

Ҳамчунин, тазаккур дода мешавад, ки Муассисаи таҳсилоти умумии ғайридавлатии “Мактаби ҷаҳон” дар якҷоягӣ бо кӯдакистон барои 560 нафар пешбинӣ гардида, бо системаи гармидиҳӣ пайваст мебошад.

“Бо таъсис ва ба фаъолият оғоз кардани муассисаи нави таълимӣ дар пойтахти мамлакат беш аз 70 нафар, аз ҷумла 23 мутахассис ба ҳайси омӯзгор ва мураббӣ бо ҷойи кор ва маоши хуб таъмин гардиданд”, - таъкид мешавад дар хабар.

Иттилоъ дода мешавад, ки раванди таълим дар ин боргоҳи маърифат бо забонҳои хориҷӣ, аз ҷумла русию англисӣ дар асоси барномаҳои давлатии таълимии соҳавӣ ва ба тариқи шартномавӣ ба роҳ монда шудааст. Хонандагон ба муассисаи таълимӣ бо роҳи суҳбат қабул карда мешаванд. 

Дар Telegram, Facebook, Instagram, OK ва ВК бо мо бимонед.