Имрӯз, 12-уми май, ба ифтихори Рӯзи Шашмақом дар Душанбе фестивали “Навои Шашмақом” баргузор мешавад. Дар ин бора аз Филармонияи давлатии Тоҷикистон ба “Азия-Плюс” иттилоъ доданд.

Ба гуфтаи манбаъ, фестивали мазкур соати 18:00 дар Филармонияи давлатии Тоҷикистон ба номи Акашариф Ҷӯраев оғоз мешавад. Вуруд ба консерт бо даъватнома ва чипта аст.

“Дар фестивали “Навои Шашмақом” Ансамбли “Шашмақом”-и Филармонияи давлатии Тоҷикистон ва шашмақомсароёни маъруф аз шаҳру навоҳии Хуҷанд, Бобоҷон Ғафуров, Исфара, Панҷакент, Конибодом, Бохтар ва Душанбе ширкат меварзанд”, - гуфтанд аз Филармония.

Тавре масъулин афзуданд, дар доираи ин фестивал шашмақомсароён қадрдонӣ хоҳанд шуд.

Бояд гуфт, Шашмақом - мусиқии суннатии миллати тоҷик аст ва аксари таронаҳои он дар бораи ишқу ирфон суруда мешавад. Дар ин навъи мусиқӣ созҳои рубоб, барбат, доира, даф ва танбур ба кор бурда мешаванд.

Маврид ба зикр аст, ки Шашмақом аз мақомҳои бузрук, рост, наво, дугоҳ, сегоҳ ва ироқ ташкил шудааст. Шашмақом гоҳо ба ҳайси мусиқии ҳол ва “Қуръон”-и мусиқӣ ёд мешавад.

ЮНЕСКО соли 2000 Шашмақомро дар феҳристи кӯҳантарин сабкҳои мусиқӣ ва ҳамчунин, меъроси ғайримодӣ сабт кард. Он аз ҷониби аксари мусиқишиносон ҳамчун шоҳкории фарҳангӣ эътироф мегардад.

Ёдовар мешавем, ки ҳар сол 12-уми май дар саросари кишвар чун “Рӯзи Шашмақом” таҷлил мегардад.

Дар Telegram, Facebook, Instagram, OK ва ВК бо мо бимонед.