Дар вилояти Суғд беш аз 60 духтур барои “иҷро накардани  дастурҳои клиникӣ” ва “риоя накардани талаботҳои протоколҳои клиникӣ” аз ҷониби Хадамоти назорати давлатии тандурустӣ ва ҳифзи иҷтимоии аҳолӣ муҷозот шудаанд.

Ба иттилои Илҳом Пӯлотзода, сардори сарраёсати Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд давоми 5 моҳи аввали соли 2023 нисбати 24 нафар корманди тандурустӣ протоколи ҳуқуқвайронкунии маъмурӣ тартиб дода шуда, ба маблағи 16 ҳазору 660 сомонӣ ҷаримабандӣ шудааст.

Инчунин, ба сарварони муассисаҳои тиббӣ мактуб ирсол гардида, дархост шудааст, ки нисбати 38 нафар корманди тибб барои роҳ додан ба кабудиҳо муҷозоти интизомӣ татбиқ карда шавад.

“Кормандони соҳаи тибб тибқи моддаи 110-и Кодекси ҳуқуқвайронкунии маъмурӣ, яъне “иҷро накардани  дастурҳои клиникӣ” ва “риоя накардани талаботҳои протоколҳои клиникӣ” муҷозоти маъмурӣ шудаанд. Аксари онҳо ба андозаи 10 нишондиҳанда барои ҳисобҳо (1 нишондиҳанда 68 сомонӣ), яъне 680 сомонӣ ҷарима гардидаанд. Танҳо як нафар духтур 15 нишондиҳанда, яъне 1 ҳазору 20 сомонӣ ҷарима шудааст”, - зикр намуд Илҳом Пӯлотзода.

Гуфтан ба маврид аст, ки хунукназарӣ, таъиноти нодурусти доруворӣ, муносибати ғайрикасбӣ ва роҳ додан ба камбудиҳо ҳангоми иҷрои вазифаҳои касбӣ аз мубрамтарин масъалаҳое аст, ки сокинон вақти интиқод аз мушкилоти соҳаи тибб номбар мекунанд.

Роҳбарияти Хадамоти назорати давлатии тандурустӣ ва ҳифзи иҷтимоии аҳолӣ дар вилояти Суғд
Акс аз муаллиф

Мақомот низ аксар ҳолат, духтуронро бо ин ҷурм муҷозот менамоянд.

Масалан, аввали соли ҷорӣ, пас аз марги шашоник дар таваллудхонаи шаҳри Хуҷанд, чанд корманди ин муассисаи тиббӣ муҷозот шуданд.

Моҳи майи соли ҷорӣ як духтури беморхонаи Ёрии таъҷилии шаҳри Душанбе барои “номатлуб иҷро кардани вазифаи касбӣ, ки боиси марги шахс шудааст” боздошт гардид.

Дар Telegram, Facebook, Instagram, OK ва ВК бо мо бимонед.