Давоми шаш моҳи соли равон дар вилояти Хатлон беш аз 380 ташкилоти ҷамъиятӣ бо сабаби камбуди маблағ барҳам хӯрдааст ва ин беш аз 50 дарсади ҳамаи ташкилотҳои ҷамъиятии дар вилоят сабтшударо ташкил медиҳад

Сафар Салимзода, сардори Раёсати адлияи вилояти Хатлон зимни нишасти матбуотияш изҳор дошт, ки давоми шаш моҳи соли ҷорӣ дар вилояти Хатлон дақиқан 383 ташкилоти ҷамъиятӣ, намояндагӣ ва филиалҳои иттиҳодияҳои ҷамъиятӣ барҳам хӯрданд.

“Аз сабаби он ки бисёри онҳо барои фаъолияти минбаъда маблағ пайдо накарданд, худи муассисон бо ариза барои барҳам додани ташкилоташон муроҷиат карданд”, - гуфт Сафар Салимзода.

Ба иттилои ӯ, дар оғози сол дар вилояти Хатлон 589 ташкилоти ҷамъиятӣ, 115 филиал ва 24 намояндагӣ фаъолият мекарданд ва ҳоло теъдоди онҳо ба 193 ташкилоти ҷамъиятӣ, 97 филиал ва 18 намояндагӣ расидааст. Ғайр аз ин, дар вилоят 13 ташкилоти ҷамъиятии ҷумҳуриявӣ низ ба қайд гирифта шудааст.

Сафар Салимзода  гуфт, дар шаш моҳи соли равон ташкилотҳои ҷамъиятии вилоят аз манбаъҳои гуногун ба маблағи 4 миллиону 528,9 ҳазор сомонӣ ва 62 ҳазору 526,3 доллари амрикоӣ маблағгузорӣ шудаанд.

Дар Telegram, Facebook, Instagram, OK ва ВК бо мо бимонед.