Давоми шаш моҳи соли ҷорӣ, дар вилояти Хатлон 5 ҳолати бастани ақди никоҳ миёни шаҳрвандони Тоҷикистон ва хориҷиён сабт шудааст.

Дар ин бора Бунафша Раҳимзода, сардори шуъбаи сабти асноди ҳолатҳои шаҳрвандии Раёсати адлияи вилояти Хатлон имрӯз, 28-уми июл, зимни нишасти матбуотӣ хабар дод.

“Дар маҷмӯъ, давоми шаш моҳи соли ҷорӣ дар вилояти Хатлон 5 ҳолати бастани ақди никоҳи шаҳрвандони Тоҷикистон бо шаҳрвандони хориҷӣ ба қайд гирифта шудааст. Аз ҷумла, дар ноҳияи Восеъ як зани тоҷик бо марди чинӣ ақди никоҳ бастааст, дар ноҳияҳои Қубодиён, Ҷалолиддини Балхӣ ва шаҳри Кӯлоб мардҳои тоҷик бо занҳои узбекистонӣ оила бунёд кардаанд ва дар ноҳияи Хуросон марди тоҷик бо зани тоҷики бидуни шаҳрвандӣ хонадор шудааст”, - гуфт Бунафша Раҳимзода.

Бунафша Раҳимзода
Asia-Plus

Ба иттилои ин масъули САҲШ дар ҳамин давраи соли гузашта се ҳолати бастани ақди никоҳ бо шаҳрвандони хориҷӣ ба қайд гирифта шуда буд.

Бояд гуфт, ки дар Тоҷикистон бастани ақди никоҳ бо шаҳрвандони хориҷӣ осон нест ва талаботҳои худро дорад. Тибқи меъёрҳои қонунгузории кишвар, ҳар нафаре, ки мехоҳад бо шаҳрванди Тоҷикистон ақди никоҳ бандад, бояд пеш аз ҳама шартномаи ақди никоҳро имзо кунад ва як соли охир дар Тоҷикистон зиндагӣ дошта бошад.

Дар Telegram, Facebook, Instagram, OK ва ВК бо мо бимонед.