Дар ноҳияи Хуросони вилояти Хатлон як зани 27-сола чаҳоргоник ба дунё овард, ки пизишкон вазъи саломатии кӯдакон ва модари онҳоро вазнин - устувор арзёбӣ мекунанд.
Тавре ба “Азия-Плюс” сардухтури беморхонаи клиникии ба номи Бӯрӣ Воҳидови вилояти Хатлон Хушнуд Баҳодурзода хабар дод, рӯзи 14-уми январ ду писару ду духтар таваллуд шудаанд, ки вазни онҳо аз 1 килою 600 грамм то 1 килою 700 грамм будааст.
Ба гуфтаи ӯ, модари кӯдакон Миҷгона Асоева, сокини деҳаи Қизилқалъа, пеш аз таваллуди чоргоник як фарзанд ба дунё овардааст.
“Аз таваллуди кӯдакон ду рӯз гузашт, онҳо таҳти назорати табибон қарор доранд. Барои барқарор кардани саломатии онҳо тамоми чораҳои заруриро меандешем”, - афзуд Баҳодурзода.
Ӯ гуфт, ки пас аз ифтитоҳи маркази перинаталӣ дар бемористон шароити ташхис ва муолиҷаи беморон, бахусус тифлони навзод беҳтар шудааст. Ин марказ бо таҷҳизоти замонавии тиббӣ муҷаҳҳаз буда, дар он пизишкони варзида кор мекунанд.
Ин бори аввал нест, ки дар Тоҷикистон чоргоник ба дунё меояд. Моҳи июни соли 2022 як сокини 27-солаи ҷамоати марзии Чоркӯҳи Исфара чаҳор духтар таваллуд кард. Онҳо бо роҳи ҷарроҳии қайсарӣ дар таваллудхонаи шаҳри Хуҷанд ба дунё омадаанд.
Дар арафаи Соли нави 2021 сокини 30-солаи ноҳияи Қубодиёни вилояти Хатлон Дилноза Мамадова якбора панҷ фарзанд – ду писару се духтар – ба дунё овард. Ҳангоми таваллуд духтурони таваллудхонаи ҷумҳуриявии шаҳри Душанбе иштирок карданд.
Моҳи январи соли 2023 бошад, дар таваллудхонаи шаҳри Хуҷанд бори нахуст дар Тоҷикистон 6 нафар – ду писару 4 духтар таваллуд шуд, вале баъди як рӯз тифлони навзод фавтиданд.
Бояд гуфт, ки сатҳи таваллуд дар Тоҷикистон баланд боқӣ мемонад. Аз рӯи афзоиши аҳолӣ дар байни кишварҳои пасошӯравӣ Тоҷикистон дар ҷойи аввал аст. Тибқи омори расмӣ шумораи аҳолӣ дар як сол ба ҳисоби миёна 2,2 фоиз ё 200 ҳазор нафар меафзояд.
Тибқи пешгӯиҳо, то соли 2030 ҷамъияти Тоҷикистон аз 11 миллион нафар мегузарад.
Руcский