Сумая, Осия, Алия ва Аҳмадҷон – номҳое ҳастанд, ки волидони чоргоникҳо қасд доранд ба фарзандонаш гузоранд. Ин тифлакон ҳафтае қабл дар таваллудхонаи “Истиқлол” ба дунё омаданд ва дирӯз, 5-уми феврал ба хонаи иҷораи волидон рухсат шуданд. Табибон вазъи саломатии онҳоро хуб арзёбӣ мекунанд.

Қаноатшо Худоёров, падари чоргоникҳо аз тавлиди фарзандон  хушҳол аст. Ӯ мегӯяд, интизор надошт, ки ҳамсараш чоргоник ба дунё меорад. Тифлҳо солиму бардам ба дунё омаданд ва ҳар кадом беш аз 2 кг вазн доранд. Ҳоло тамоми хешу табор барои дидани ин тифлакон ба хонаи Қаноатшоҳ омадаанд. Хонаи иҷорае, ки ҳар моҳ барои он 4 ҳазор сомонӣ пардохт бояд кард.

Падари чоргоникҳо қабл аз тавлиди кӯдакон дар сохтмон кор мекард, аммо баъди тавлиди навзодҳо як ҳафта аст, ки бекор аст. Ӯ мегӯяд, ҳоло пайдо кардани коре, ки ҳам иҷораву хароҷоти хона ва ҳам ғизову эҳтиёҷоти  кӯдаконро таъмин кунад, мушкил аст.

Asia-Plus

Гулзира Мирзобекова, модари чоргоникҳоро ҳам ҳамин фикр ба ташвиш овардааст. Ӯ мегӯяд, бисёр хуб мешуд, агар ҳади ақал дар пойтахт барояшон як  манзили якҳуҷрагӣ ҷудо мекарданд. Ин кори хайр мушкили онҳоро чандин маротиб осонтар мекард.

Asia-Plus

Дар Тоҷикистон тавлиди чоргоник ва ё зиёда аз он қаблан низ сабт гардидааст. Дар аксари ҳолат, ҳукумати кишвар ва шахсони алоҳида ба волидони тифлон кӯмакҳо кардаанд.

Дар Telegram, Facebook, Instagram, OK ва ВК бо мо бимонед.