Дар Тоҷикистон 12 зан ба шавҳари собиқи худ барои нигоҳубини фарзанд алимент месупоридаанд. Ин нисбат ба соли 2022 7 ҳолат бештар будааст.

Дар ин бора Барно Саидвализода, сардори Хадамоти иҷрои назди Ҳукумати Ҷумҳурии Тоҷикистон, зимни нишасти матбуотӣ хабар дод.

Дар умум, ба қавли Барно Саидвализода, соли 2023 барои ситонидани алимент 10 ҳазору 912 дархост ворид шудааст, ки ин нисбат ба соли 2022 724 ҳолат кам мебошад.

Ҳарчанд шумораи ҳуҷҷатҳои воридшуда барои ситонидани маблағи алимент коҳиш ёфта бошад ҳам, теъдоди онҳое, ки аз пардохтӣ алимент саркашӣ кардаанд, зиёд шудааст. Соли 2023 398 нафар аз пардохти алимент саркашӣ кардаанд, ки нисбат ба соли 2022 106 ҳолат бештар будааст.

“Нисбати онҳое, ки аз пардохти алимент саркашӣ кардаанд, бо пешниҳоди иҷрочиён аз ҷониби додситонии кишвар парвандаи ҷиноятӣ боз гардидааст”, - гуфт Барно Саидвализода.

Ҳамчунин, 568 нафар қарздорон барои сари вақт напардохтани маблағи алимент ва пинҳон кардани суроғаи зист дар кофтуков қарор доштаанд.

Дар маҷмӯъ, соли 2023 ба манфиати модару кӯдак 33,3 млн сомонӣ маблағи алимент ситонида шудааст.

Дар Telegram, Facebook ва Instagram бо мо бимонед.