Обуҳавошиносони Тоҷикистон хабар медиҳанд, ки рӯзи 17 май дар баъзе ноҳияҳои тобеи марказ тӯфони чангу ғубор боқӣ мемонад.
Аммо аллакай рӯзи 18 май борони пуршиддат бо раъду барқ ва жола меборад. Ҳамчунин пурзӯр шудани вазиши шамол пешгӯӣ шуда, дар баъзе ноҳияҳо суръати он ба 10-15 метр дар як сония мерасад.
Дар қаламрави вилояти Хатлон рӯзҳои 17-18 май ва шаби 19 май боришот, дар як қатор ноҳияҳо боришоти пуршиддат дар назар аст. Дар вилояти Суғд низ боришот пешгӯӣ шуда, 18 май дар баъзе ноҳияҳои вилоят боришот бо раъду барқ ва жола пешбинӣ мешавад. Шамол аз самти ғарб вазида, рӯзҳои 17-19 май дар баъзе ноҳияҳо суръати он ба 15-20 метр дар як сония мерасад.
Дар қаламрави ноҳияҳои ғарби ВМКБ боришоти шадид (раъду барқ, жола, шабона дар баландии зиёда аз 3000 метр аз сатҳи баҳр борон ба барф табдил меёбад) пешгӯӣ мешавад. Суръати вазиши шамол дар баъзе ноҳияҳо то 10-15 метр дар як сония мерасад.
Дар робита ба ин, Кумитаи ҳолатҳои фавқулодаи ҷумҳурӣ бо муроҷиат ба идораҳои мутасаддӣ ва аҳолӣ бо мақсади пешгирии садамаҳои марбут ба оқибатҳои эҳтимолии шароити обу ҳаво, хоҳиш мекунад, ки ҷиҳати пешгирии оқибатҳои омадани сел, каналу селроҳа ва ҷӯйборҳо тоза карда шаванд.
“Аз волидон хоҳиш карда мешавад фарзандони ноболиғашонро беназорат нагузоранд, онҳоро ба моҳидориву чорвочаронӣ ва ғунучини гиёҳҳои шифобахш нафиристанд”, - тавсия медиҳад Кумита.
Ҳамчунин Кумита ба сайёҳон тавсия додаааст, ки дар чунин рӯзҳо аз сайру саёҳатҳо ба мавзеъҳои кӯҳӣ худдорӣ кунанд. Ба ронандагон тавсия мешавад, ки зимни ҳаракат дар ағбаву роҳҳои кӯҳӣ ҳамаи қоидаҳои ҳаракат ва тадбирҳои бехатариро риоя кунанд.
Гуфта мешавад, дар сурати пеш омадани ҳолати нохуш ё фавқулода шаҳрвандон метавонанд ба телефони 112 ва ё қисми навбатдории КҲФ: 223-13-11; 93 880 28 19 занг зананд.
Руcский