Як хонандаи мактаб дар ноҳияи Деваштичи вилояти Суғд дар рӯзи аввали соли хониш худкушӣ кардааст. Сабаби худкушии хонандаи мактабро додситонӣ таҳқиқ мекунад.

Даврон Зикриллоев, мудири шуъбаи маорифи ноҳияи Деваштич ба “Азия-Плюс” гуфт, Ҷ.Ҳ. (ному насаб бо сабаби ахлоқӣ ошкор намешавад) дар рӯзи аввали соли хониш дар хонаи худ худро ба дор кашидааст.

“Ӯ дар синфи 9-и яке аз мактабҳои ноҳия таҳсил дошт ва пештар ҳуҷҷатҳояшро барои идомаи таҳсил ба яке аз гимназияҳо супорида буд. Мехост илмҳои дақиқро хубтар аз худ карда, ба Донишгоҳи тиббии Тоҷикистон дохил шавад”, - гуфт манбаъ.

Сабаби худкушии ин хонандаи мактаб маълум нест. Дар мақомоти милитсияи вилояти Суғд ҳодисаро тасдиқ карда, гуфтанд, ки аз руйи салоҳият ҳодисаро мақомоти додситонӣ таҳқиқ дорад.

Ба қавли ҳамсуҳбати мо, ин хонанда баъди аз ҳам ҷудо шудани волидонаш, бо модараш дар хонаи падарандар зиндагӣ доштааст.

Ёдовар мешавем, ки ин аввалин ҳодисаи худкушӣ дар Деваштич давоми соли ҷорӣ нест. Моҳи марти имсол низ як хонандаи мактаб дар ҷамоати деҳоти Муҷуни ин ноҳия худкушӣ карда буд.

Дар Telegram, Facebook ва Instagram бо мо бимонед.