Давоми 9 моҳи имсол ба 3 ҳазору 59 сокини бекори вилояти Суғд 2 миллиону 841,7 ҳазор сомонӣ кӯмакпулӣ пардохт шудааст. Дар ин бора Шермуҳаммад Нодирӣ, сардори Раёсати Агентии меҳнат ва шуғли аҳолӣ дар вилояти Суғд иттилоъ дода, гуфт, се гурӯҳ шахсони бекоре, ки ҳамчун корҷӯ ба қайд гирифта мешаванд, аз кӯмакпулии давраи бекорӣ бархӯрдор мешаванд. Инҳо нафарони аз хидмати ҳарбӣ озодшуда, собиқ маҳбусон ва шаҳравандоне, ки корхонаашон барҳам хӯрдааст.

Гуфта шуд, имсол теъдоди гирандагони кӯмакпулии давраи бекорӣ нисбат ба ҳамин давраи соли гузашта 250 нафар зиёд шуда, ҳаҷми кӯмакпулӣ 335,4 ҳазор сомонӣ афзудааст.

Аз рӯйи маълумоти ин ниҳод, ба 284 нафар собиқ маҳбусон кӯмакпулӣ пардохт гардидааст.

“Давоми 9 моҳи соли 2024 ба Агентии меҳнат ва шуғли аҳолӣ 397 нафар шаҳрвандони аз муассисаҳои иҷрои ҷазои ҷиноятӣ озодгардида муроҷиат намуданд, ки 165 нафари онҳо бо ҷойи корӣ таъмин гардиданд”, - гуфт Шермуҳаммад Нодирӣ.

Ин кӯмакпӯлӣ солҳои қабл 600 сомонӣ буда, аз якуми июли имсол 800 сомонӣ муқаррар гардидааст ва то се моҳ пардохта мешавад.

Ёдовар мешавем, давоми нӯҳ моҳи имсол ба  шӯъбаю бахшҳои Агентии меҳнат ва шуғли аҳолӣ вилояти Суғд 35 ҳазору 53 нафар шаҳрванд муроҷиат намуданд ва 17 ҳазору 259 нафар ба ҷойи корӣ таъмин шудаанд. Аммо ҳамоно таъмини аҳолӣ бо ҷойи кор аз мушкилоти умда дар кишвар боқӣ мемонад.

Дар Telegram, Facebook ва Instagram бо мо бимонед.