Вазорати фарҳанги кишвар чанд асари рассомони тоҷикро харидорӣ кардааст. Ин асарҳо дар доираи як комиссияи хариди асарҳои рассомон, ки аз ҷониби худи вазорат таъсис ёфт, харидорӣ гардид. Дар ин бора аз Вазорати фарҳанги кишвар ба “Азия-Плюс” хабар доданд.

Вале манбаъ нагуфт, ки ин вазорат чанд асари рассомони тоҷик ва бо чӣ арзише харидорӣ кардааст.

Ба гуфтаи ҳамсуҳбати мо, ба комиссияи хариди асарҳои рассомӣ, ки дар он намояндагони Академияи мусаввирон, Иттифоқи рассомони Тоҷикистон, Академияи миллии илмҳо, Коллеҷи ҷумҳуриявии рассомии Тоҷикистон ва Донишкадаи санъати тасвирӣ ва дизайни Тоҷикистон буданд, 89 асари эҷодии рассомӣ дар мавзуъҳои мухталиф пешниҳод гардид. 

Комиссияи харид 6-уми декабр ин асарҳоро аз назар гузаронида, ҳар яки онро баҳогузорӣ ва беҳтарин асарҳоро барои харид ба вазорати фарҳанг тавсия додааст.

1/6
“Бештари асарҳое, ки харидорӣ карда шуданд, натюрморт ва пейзаж буда, табиати Тоҷикистонро инъикос мекунанд. Ҳамчунин,  асарҳое буданд, ки ба фарҳанг, маданият ва урфу одатҳои халқи тоҷик нисбат доштанд”, - шарҳ доданд аз вазорат.

Ба иттилои ин ниҳод, ҳамаи асарҳои харидоришуда мусаввараи рассомони касбӣ будаанд. Баъзе асарҳои донишҷӯён низ  ба комиссия пешниҳод шуда буданд, вале бинобар сабаби касбӣ набуданашон харидорӣ нагардиданд.

Хариди асарҳои рассомӣ дар Тоҷикистон ҳамасола пеш аз ҷамъбасти сол доир мегардад. Ҳадаф аз таъсиси Комиссияи мазкур ва маъракаи хариди асарҳои рассомӣ дастгирии рассомон ва қадршиносии ҳунари асил арзёбӣ мешавад.

Мусаввирони Тоҷикистон дар ҳама жанрҳои санъати тасвирӣ асарҳо офаридаанд, ки аксари онҳо дар хазинаи Осорхонаи миллӣ маҳфузанд. Дар фонди Осорхонаи миллӣ зиёда аз 3 ҳазор мусаввара дар жанрҳои гуногуни санъати тасвирӣ ҳифзу нигоҳдорӣ мешаванд.

Дар Telegram, Facebook ва Instagram бо мо бимонед.