Парвози аввалини ҳавопаймо дар масири Душанбе-Панҷакент-Душанбе имрӯз, 24 январ бо 17 мусофир анҷом ёфт. Дар ин бора аз ширкати ҳавопаймоии “Тоҷик Эйр” ба “Азия-Плюс” иттилоъ дода, гуфтанд, парвози ҳавопаймо аз Душанбе ба Панҷакент ва баръакс 45 дақиқаӣ давом кардааст.

“Ҳавопаймо аз Душанбе соати 10:25 парвоз карда, соати 11:10 ба фурудгоҳи Панҷакент фуруд омад. Аз шаҳри Панҷакент ҳавопаймо соати 12:25 парвоз карда, соати 13:10 ба Душанбе фуруд омад” – гуфтанд аз ин ширкат.

Дар ҳавопаймо як қатор мансабдорон, аз ҷумла муовини раиси шаҳри Панҷакент, муовини директори генералии ин ширкат низ будаанд. Мусофиронро дар Панҷакент масъулини ҳукумат ва аҳли ҳунар пешвоз гирифтаанд.

1/2

Ёдовар мешавем, ки ширкати ҳавопаймоии “Тоҷик-Эйр” рӯзи 8-уми январ аз кушода шудани хатсайри нави ҳавоӣ дар масири “Душанбе-Кӯлоб” ва “Душанбе-Панҷакент” иттилоъ дода буд.

Парвози аввалин дар масири “Душанбе-Панҷакент” бояд 14-уми январ анҷом меёфт, аммо 4 маротиба ба таъхир гузошта шуд. Масъулин сабаби ба таъхир гузошта шудани парвозҳоро ба номусоидии ҳаво рабт дода буданд.

Парвоз дар масири “Душанбе-Панҷакент” ва баръакс ҳафтае се маротиба, рӯзҳои сешанбе, панҷшанбе ва якшанбе сурат мегиранд. Арзиши чиптаи ин масир 400 сомонӣ гуфта мешавад.

Дар Telegram, Facebook ва Instagram бо мо бимонед.