Аз 12-уми июн мавсими истироҳати тобистона барои кӯдакон ва наврасон дар Тоҷикистон оғоз мегардад. Дар доираи он, зиёда аз 303 ҳазор кӯдаку наврас дар 3 ҳазору 740 истироҳатгоҳ (лагерҳо) ба истироҳату фароғат фаро гирифта мешаванд. Дар ин бора аз Маркази ҷумҳуриявии муассисаҳои таҳсилоти иловагӣ ба “Азия-Плюс” иттилоъ доданд.
Ба гуфтаи манбаъ, имсол кӯдакон дар 28 истироҳатгоҳи беруназшаҳрӣ, 1637 мактабӣ, 527 солмигардониву варзишӣ, 392 солимгардониву меҳнатӣ, 759 таълимиву фароғатӣ ва 377 осоишгоҳҳо истироҳат мекунанд.
Зиёда аз 303 ҳазор кӯдаку наврас, аз ҷумла кӯдакони ятим, ғолибони олимпиадаву озмунҳо, инчунин, кӯдакон аз хонаводаҳои камбизоат ва имконияташон маҳдуд ба истироҳат ва солимгардонӣ фаро гирифта мешаванд.
“Ба ҷалби истироҳати тобистонаи кӯдакони ятим ва ғолибони олимпиадаву озмунҳо таваҷҷуҳи хосса зоҳир мешавад. Имсол масалан, 709 кӯдакони ятим, 4391 - нимятим, инчунин 39 ҳазору 907 ғолибони олимпиада ба истироҳатгоҳҳо равон мешаванд”, - гуфтанд дар Марказ.
Басти аввали мавсими тобисон 12 июн оғоз гардида, 12 рӯз давом мекунад. Осоишгоҳҳо дар 1-4 баст кор карда, барои кӯдакону наврасон чорабиниҳои варзишиву фарҳангӣ ва фароғатӣ, кори маҳфилҳои забони хориҷӣ, компютер ва фанҳои дақиқ роҳандозӣ мешаванд.
Истироҳатгоҳҳои беруназшаҳрӣ дар минтақаҳои гуногуни кишвар фаъол хоҳанд буд:
- дар ВМКБ - 5-то;
- дар вилояти Суғд - 10-то;
- дар вилояти Хатлон - 4-то;
- дар Душанбе - 2-то;
- дар шаҳру навоҳии тобеи марказ - 7-то.
Қаблан Федератсияи иттифоқҳои касабаи мустақилиТоҷикистон дар ҷаласаи ситоди ҷумҳуриявии "Тобистон-2025" бо роҳбарону мудирони истироҳатгоҳҳо хабар дод, ки барои таъмини истироҳати босифат ҳудуди 5000 истироҳатгоҳҳо (томактабӣ, варзишӣ, дармонӣ, солимгардонӣ ва меҳнатӣ) ба корҳои омодагӣ ба мавсими тобистон оғоз карданд. Дар онҳо зиёда аз 250 ҳазор кӯдакону наврасон метавонанд истироҳати тобистонаи худро гузаронанд.
Дар ин пайванд дар бораи маконҳои истироҳати имсола барои кӯдакону наврасон дар Тоҷикистон маълумоти гиред.
Руcский