Дар Фурудгоҳи байналмилалии Душанбе сохтмони 10 таваққуфгоҳи иловагӣ (ҷои ист) барои ҳавопаймоҳои калонҳаҷм ва хати зимомӣ (рулежний)-и нав бо дарозии 1,5 км ва паҳноии 60 метр оғоз шудааст.

Дар ин бора аз маркази матбуотии Фурудгоҳи байналмилалӣ ба “Азия-Плюс” хабар дода, гуфтанд, ҳамчунин 250 ҳазор метри мураббаъ хатҳои зимомӣ ва перонии фурудгоҳ пурра таъмир ва мумфарш мешавад.

“Хати зимомии нав барои таъмини бехатарии парвозҳо зимни фуруд ва парвоз бо дарозии 1,5 км ва паҳноии 60 метр сохта мешаванд”, - гуфтанд аз ин ниҳод.

Манбаъ зикр кард, ин тасмим дар пайи эълони сиёсати “Осмони кушод” дар бахши ҳавонавардии кишвар рӯи даст гирифта шуда, корҳои сохтмонӣ дар мудди 2-3 моҳ пурра ба анҷом мерасад.

Моҳи июни соли равон ҳукумати Тоҷикистон сиёсати “Осмони кушод” ҷорӣ кард, ки тибқи он аз ин ба баъд низоми паритет ё баробарӣ дар парвозҳо, ки қаблан шумораи парвозҳои ширкатҳои хориҷиро бо ширкатҳои дохилӣ баробар ва маҳдуд мекард, бекор карда мешавад.

Маълум нест, ки барои сохтмону таъмири таваққуфгоҳи иловагӣ ва хатҳои зимомӣ ва перонии фурудгоҳ чӣ қадар маблағ сарф мешавад.

1/5

 

Сохтмони терминали нав ва минтақаи махсус барои гуселу пешвози мусофирон

Ёдовар мешавем, ки ҳамчунин, дар Фурудгоҳи байналмилалии Душанбе ҳоло сохтмони  терминали нав идома дорад.

Зайнулло Шарифзода, раиси ин фурудгоҳ дар нишасти матбуотии чанд рӯз пеш гуфт, барои таҳияи ҳуҷҷатҳои лоиҳа, мутахассисон аз Туркия даъват шудаанд ва он  бояд дар давоми як то ду соли оянда ба истифода дода шавад.

Ғайр аз ин, дар фурудгоҳи пойтахт минтақаҳои махсус барои гуселу пешвози мусофирон сохта мешаванд. Корҳои сохтмонӣ дар ин минтақаҳо ба наздикӣ анҷом меёбанд ва онҳо мавриди истифода қарор хоҳанд гирифт.

Ҳамчунин моҳи майи солӣ ҷорӣ ворид шудан ба минтақаи гуселу пешвози парвозкунандаҳо дар Фурудгоҳи Душанбе барои шахсоне, ки ба истиқбол ё видоъи мусофирон мераванд, манъ шуд.

Масъулони фурудгоҳ ин мамнуъиятро ба риояи қоидаҳои байналмилалии амнияти парвозҳо, нигоҳ доштани тартиби ҷамъиятӣ, иҷрои меъёрҳои беҳдоштӣ, аз ҷумла, пешгирии паҳншавии бемориҳои сироятӣ ва тоза нигоҳ доштани фурудгоҳ рабт доданд.

Дар Telegram, Facebook ва Instagram бо мо бимонед.